Sdang ka jingialehkai football ki kynthei ka EJHDFA, jop ka Diengshynrum bad Dkhiah West

Syllad | The Rising MeghalayaDecember 14, 2023

Ka jingialehkai football ki kynthei, ka Women’s League kaba pyniaid daka East Jaintia Hills District Football Association (EJDHFA) kala sdang da ka nam jop ka Diengshynrum bad ka Dkhiah West ha madan phlang plastic ha Diengshynrum, Khliehriat haka 14 tarik Nohprah.

Kane kan dei ka sien kaba ar bala pynlong iaka jingialehkai football ki kynthei da ka EJHDFA bad ia kane ka trophy la tip kum ka Late. Mary Tlang Memorial Trophy.

Haba phai sha ka jingialehkai haka sngi sdang, ka Diengshynrum SC kala jop iaka Iongkaluh SC da 8-0. Ka Felicia Sympli marwei kala thep 4 kol (2’, 40’, 53’, 55’) bad mar ar kol na ka Alisha Lyngdoh (29’, 41’) bad ka Evangelin Bareh (23’, 51’).

Ha kawei pat ka jingialehkai ka Dkhiah West SC kala jop da 7-1 iaka Wapung Combine SC. Na kaliang ka Dkhiah West ia kine ki kol la thep da thep daka Russia Dkhar (17’, 24’, 60’, 70’), Batbitbha Bareh (5’, 59’), Dakani Shylla (63’). Ia ka shikol ka Wapung Combine Sc la thep daka Charlin Nongtdu (46’).