Sdang ka jingiakhih ka JHTOA pyrshah iaki karkhana dewbilat

Syllad | The Rising MeghalayaOctober 6, 2023

Ka jingiakhih jong ka seng ki trai trok hapoh ka lama Jaintia Hills Truck Owners’ Association (JHTOA) kala sdang haka 5 tarik Risaw. Kane ka jingiakhih jong ki seng ki trai trok ka klong kaba khlem buh bor, kata ka dei ban sangeh iaka kit ka bah na ki karkhana dewbilat na East Jaintia Hills District.

Ha kane ka sngi sdang haduh 25 tylli ki trok kit dewbilat, clinker kila shah pynphai ha Takhniang, Tuberkmaishnong hajan ka ophis treikam jong ka seng JHTOA.

Haba iakren bad u President ka JHTOA u Ma Biangshwa Shylla ula ong ki karkhana pynmih khyndew bilat kiba don haka thain Lumshnong, Wahiajer bad Thangskai na ka por sha ka por ki thok bad kim bud ia kaei kaba iakut iaka rukom thep mar ki trok trai ri trai muluk.

Ha ka jingialang bad u DC ka East Jaintia Hills haka 19 tarik Jylliew 2023 ka synjuk ki karkhana dewbilat- ka Jaintia Hills Cement Manufacturing Association kala mynjur ban ai bhah haduh 60 tylli ki kali iaka JHOTA ban kit mar, hynrei katba dang mih ki sngi kane ka bhah jong ki kala nang nang hiar haduh tang kumba 15 tylli ki trok haka shi sngi

Kane kala pynshrai iaka nongialam ka JHTOA bad kila shim iaka sien jam ban pynlong da ka jingiakhih kaba khlem buh por ban pynbor ia ki karkhana ban pyntreikam iaka jingiakut haka kit ka bah