Sdang ka jingiakhih ba khlem pud ka NEHUNSA, sangeh ki jingtreikam ka skulbah NEHU

Syllad | The Rising MeghalayaNovember 4, 2024

Ki non-teaching staff jong ka  North Eastern Hill University (NEHU) haka 4 tarik Naiwieng, ki la pynlong iaka jingsangeh trei khlem buh por ban pyrshah halor ka jingpynslem iaka promotion bad ka jingthung kam na ka bynta ki kam  kiba la dep advertise ha ka 3 tarik u Naiwieng, 2023.

Haba kren sha ki lad pathai khubor, u president ka NEHUNSA Non-Teaching Staff Association (NEHUNSA) u Dr WR Synrem u la ong ba ka seng ka la hap ban shim ia kane ka sienjam ban iakhih pyrshah khlem pud namar bala duna nongtrei shaba palat kynthup ha Shillong bad Tura Campus

U la ong ba katkum ki kyndon jong ka University Grants Commission (UGC) ka ratio ka dei ban long 1:1.1 kaba mut ba ka jingdon ki nongtrei ka dei ban long 512 ngut.

Kaba sngewsih ka long ba ka strength ne ka jingbun ki nongtrei mynta ka long haduh 250 ngut kynthup ia ka Tura campus bad mynta u snem kumba 50 ngut tam ki non teaching staff kila shongthait noh

Ha u snem ban wan ruh, lada shongthait ki nongtrei kanlong kumjuh  ka jingkhein, kumta ngi tieng mano ban trei ha ka jaka jong ha kane ka skul bah bad kumno ka university kan treikam khamtam ki non teaching staff ki treikam ha kaba ki iadei bad nonghikai bad samla pule bad baroh kan shah ktah lad ym don ki non teaching staff.

Haba kylli, u president NEHUNSA u la ong ba katkum ka khubor ba la iohlum, ka bor pyniaid kan sa khot ia ka seng ban iakren haduh lashai ka sngi.

“Ngi kyrmen ba kan long ka jingiakren kaba seisoh namar ngi ruh ngim kwah ba ki briew kin jynjar namar ba ki briew kin jynjar shisien ba ngi iakhih hynrei ngi iakhih na ka bynta ka skulbah”, u la ong.

Haba kylli halor ki jingdawa ba la buh da ka NEHUTA bad ka NEHUSU, u Dr Synrem u la ong, “Ngim don bynta pura bad ka jingiakhih jong ki, hynrei ngi la ai ïa ka shithi jingkyrshan jong ngi ïa ki mat bad palat ïa kata ym don jingkynthoh ei ei.”

Halor ka rukom treikam jong u vice chancellor ba mynta, u president jong ka seng u la ong, “Kum u khlieh jong ka jaka pule, la khmih lynti ba u (VC) un don ha ka jaka treikam hynrei man ka por u don shabar jaka treikam. Ngi la ïakren bad u hynrei u la ong ba u don ki jingkhot nangne ​​nangtai u hap ban leit sha ki prokram bad baroh bad kata ka la ktah haduh katta katta.”