Sdang ka jingiaid rally thuk thuk ka kynhun ki CRPF kynthei na Shillong sha Gujarat

Syllad | The Rising MeghalayaOctober 6, 2023

U Myntri Rangbah ka jylla u Conrad K Sangma ha ryngkat u Bah Paul Lyngdoh Myntri ka Tnat Social Welfare bad Anurag Agarwal, IPS, IG, NE Sector, CRPF  haka sngi Palei ki la kaweh lama na ka bynta ka rally thuk thuk jong ka kynhun ‘Yashaswini’  na ka tnat CRPF ki kynthei ha ka nongbah Shillong shibynta ban ialap paidbah halor ka jingkordor jong ki khunlung kynthei bad ban rakhe ia ka Nari Shakti (Women Power) ne ka bor jong ki kynthei.

Kane ka jingiaid rally da ki thuk thuk ka la sdang na ki laitylli ki bynta jong ka ri, kata napoh Srinagar, Shillong bad  Kanyakumari, bad baroh kin iakynduhlang haka 31 tarik Risaw ha Ekta Nagar, Gujarat kaba dei ka sngi kha jong u Sardar Vallabhbhai Patel. Ka jingiaid lynti ka ban kot haduh 3291 km bad ka ban iaid lyngba ia ki 7 tylli ki jylla.

Ha kane ka jingiaid lynti kin leit ruh ban iashim bynta ha ki jingialang bapher bapher ha kiba bun ki district kaba kynthup ia ki jingiamir jingmut ha kaba iadei bad ka mat  “Beti Bachao Beti Padhao” bad ki khynnah skul, ki samla kolej kynthei bad ki kynhun SHG jong ki kynthei, NCC, ki khynnah ka CCI, NYKS, ki khynnah kynthei bad shynrang kiba sdang kynjoh sha ka jinglong samla, bad ki nongtrei anganwadi bad kiwei pat nalor ka jingpynkup burom ia ki kynthei kiba ioh ia ki jingjop ha ki liang bapher bapher.

Ha ka jingkren u Conrad Sangma da kaba ai burom ia kane ka kynhun ki nongniah  thuk thuk ki kynthei na ka tnat CRPF, u la ong ba ki kynthei ruh ki don ia ka jingmar iaryngkat bor bad kane hi ka dei ka nuksa.U la pyrto ruh ia kane ka kynhun niah thuk thuk halor ka jingshim ia kane ka sienjam kaba jwat ha ka jingiaid lynti kaba jngai.U la ong ba kane ka dei ruh ka dak jong ka jingkhlainbor bad ka jingkut jingmut hapdeng ki kynthei bad ka ban ai mynsiem ruh ia kiwei pat ki para kynthei ha ka ri baroh kawei.

Na ka liang u Bah Paul Lyngdoh ruh ha ka jingkren u la pynpaw halor ka jingdonkam ban aibor ia ki kynthei, bad kane ka rally ka dei ka sienjam kaba lam sha kata ka lynti ban pynioh ia ka jinglong marryngkat hapdeng ki shynrang bad ki kynthei.

Ha kane ka jingiaid lynti kaba jngai kane ka kynhun ki nongniah thuk thuk kynthei ki wah ruh ryngkat ia ka khubor ialap kiba don ia ki jingthoh “Desh Ke Hum Hain Rakshak“, bad  “Beti Bachao Beti Padhao“ nalor u logo BBBP ha ki uniform bad ki banar ki jong ki.