Sdang ka Inter School Athletic Meet u DSO East Khasi Hills

Syllad | The Rising MeghalayaMay 18, 2022

Ka Inter School Athletic Meet kaba pyniaid da ka ophis u District Sports Officer, East Khasi Hills District kala sdang haka sngi Balang ha madan ialehkai athletic jong ka SAI, SAG, kaba don hapoh ka kut ka skul bah pule ka jylla ka North Eastern Hills University.

Ia kane ka lympung la wan ban plie pyrda da ka Kong Isawanda Laloo (IAS), Deputy Commission East Khasi Hills District.

Ka jingpynlong ia kane ka lympung ha madan ialehkai ka SAI kalong namar ba ka jingmaramot bad tei thymmai ia ka JN Stadium Polo ka dang iaid shait shait mynta.

Ka Kong Isawanda kala kitbok kitrwiang ia baroh ki skul kiba la poi ban wan ban iashim bynta sha kane ka lympung, kaba jia long ba la lah ban pynialehkai biang ia ka hadien ar snem naka jingwan ban lyngshop jong ka khlam jingpang Covid 19.

Shuh shuh Ka Kong Isawanda kala pynkynmaw iaki khynnah ialehkai ban don iaka mynsiem ialehkai namar ba lyngba ka sports ka hikai iaki khynnah haka akor ka burom bad ka iarap ban pynleit jingmut bad ban iaka thong haka jingim.       

U Bah Oral Mawthoh DSO ula ai iaka kyntien ai khublei bad hadien kane, la bynrap sa ka March-in jong ki khynnah skul bad kong Isawanda kala kyntiew ia ka lama ka tnad sports bad ka jingshim jingkular ki khynnah.