Sdang ka Inter School Athletic Meet ha Khliehriat palat 600 ki athlete kiban iakhun

Syllad | The Rising MeghalayaApril 30, 2025

Ka District Level Inter School Athletics Meet kaba lai sngi lynter bala pynlong da ka ophis District Sports Officer, East Jaiñtia Hills District ryngkat ka jingïatreilang ka East Jaintia Hills District Football Association (EJHDFA) la sdang haka 30 tarik Iaiong ha madan ïalehkai Teilang Dkhiah West, East Jaintia Hills District.

Ha kane ka sngi sdang ia kane ka athletic meet la iadonlang u Additional Deputy Commissioner East Jaintia Hills District u SR Marak, u Additional Superintendent of Police East Jaintia Hills District u S Paslein kum ki kongsan, ka District Sports Officer East Jaintia Hills District ka Kong Stephanie M Rapsang, ki nongialam bad dkhot nongkitkam jong ki synjuk ialehkai bapher bapher, ki principal ki nonghikai bad ki khynnah skul.

Ha kane ka lympung ialehkai kaba lai sngi ki jait jingialehkai ki long 42 tylli bad la iashim bynta palat 600 ngut ki khynnah na ki 23 ki skul hapoh ka District hala ki jong ki kyrdan ialehkai kynthup ka Under-16 bad Under-18 kynthei bad shynrang.

Katto katne ki jingialehkai ba la pyndep ki long haka Shot Put jong ki khynnah Under-16 Boys, u Nightiful Sukhlain na Khliehriat Presbyterian Secondary School u la ioh ban khur ia ka takma ksiar, u Arwinki Rymbai na Wapung Higher Secondary School u la khur ia ka takma rupa katba u Mutskhem Sari na Sein Jait Tuber Higher Secondary School u la khur ia ka takma rnong.

Ha ka kyrdan Under-18 Boys, u Vincent Chyrmang na Wapung Higher Secondary School ula khur ia ka takma ksiar bud sa u Ram Lyngdoh na Sein Jait Tuber Higher Secondary School bad u Edyson Dkhar na ka Sham Sham Secondary School kiba la khur ia ka takma rupa bad takma rnong.

Ha ka jingïalehkai High Jump jong ki khynnah shynrang kiba hapoh 18 snem ka rta, u Kynsai Rymbai na K.B. Memorial Secondary School ula khur iaka takma ksiar, u Heimonmi Dkhar na San Shnong Secondary School bad Daoshwa Dkhar na Wapung Higher Secondary School ki la khur ïa ka takma rupa bad takma rnong.

Ha ka jingïakob Long Jump jong ki khynnah kynthei kiba hapoh 18 snem ka rta, ka Fancy Meliorate Siangshai na K.B Memorial Secondary School ka la ïoh ban khur ïa ka takma ksiar, katba ka Olivia Bareh na ka Ambrose Memorial Secondary School bad ka Juh Phawa na Sein Raij Branch (Jalyah) ki la khur biang ïa ka takma rupa bad rnong.

Ha ka jingïakob Javelin Throw jong ki kynthei kiba hapoh 18 snem, ka Eunikilalthangthhari Ngamlai na Khliehriat Presbyterian Higher Secondary School ka la ïoh ban khur ïa ka takma ksiar katba ka Sathi Phawa na San Shnong Secondary School bad ka Tholinda Swer na Rymbai Government Secondary School ki la ïoh ban khur ïa ka takma rupa bad kum takma rnong.