Sdang ka football 6 Aside ka LYSA ha Jowai

Syllad | The Rising MeghalayaJune 11, 2023

Ka lympung ialehkai kaba mar 6 ngut shiliang, kaba tip kum ka 6-Aside Football Tournament ba la pyniaid da ka Lion Sports and Youth Affairs (LSAYA) ka la sdang haka madan ka Biar haka sngi Saitjain.

Ha kane ka lympung ialehkai la wan ia shim bynta da ki 18 tylli ki kynhun ialehkai.

U kongsan u Nibatskhem Marang uba trei kum u kontrak ula plie paidbah ia kane ka jingialehkai haka jingdonlang u symbud kongsan u muktiar Soumitra Chakravarty, ki nongkitkam ka Dorbar shnong Lion Mission Compound bad kiwei kiwei haka jingialang lyngkot ba la pyniaid da u President LSAYA u Donkupar Syngkrem.

Haka sngi sdang jong ka jingialehkai, ka jingiakhun ka long hapdeng ka Phiam FC pyrshah ia ka Ku Chaphrang. Ka Chaphrang United pyrshah iaka Golden Rise.

Haka jingiakhun kaba nyngkong ka Phiam FC ka la jop da 3-1 pyrshah iaka Ku Chaphrang.

Iaki lai tylli ki kol jong ka Phiam FC la thep da u Banteibor Syngkrem bad u Rimi O Lyngdoh uba la ioh thep artylli. Katba iaka shikol jong ka Ku Chaphrang la thep da u Sahame Sumer.

Haka jingialehkai kaba bud, ka Chaphrang United ka la pynliem da 6-5 iaka Golden Rise kaba la wan da ka jingiashut penalty (Penalty shoot out) hadien ba ka jingiakhun kaba la buh haka por ka la kut da ka jingiakhait kaba mar 1-1.