Sdang ka EKH ia ka coaching cum training na ka bynta ki samla ba kwah rung kam shipai

Syllad | The Rising MeghalayaMay 20, 2025

Ka bor pyniaid District ka East Khasi Hills haka 19 tarik Jymmang ka la sdang ia ka pre-recruitment coaching cum training kaba 45 sngi na ka bynta ki samla kiba don jingthmu ban iakhun ban ioh rung sha ka kam shipai Indian Army kum ki Agniveer. 

Kane ka prokram aijinghikai ba la pynlong hapoh KJP Synod Girls Higher Secondary School Mawkhar, Shillong ka thmu ban btin lynti lyngba ki jingai jinghikai ia ki samla kumno ba kin nang ban pynkhreh ban iakhun ia ka Common Entrance Exam kaba la pynkhreh ban pynlong ha u bnai Jylliew lane ha ka taiew kaba sdang jong u Naitung 2025.

Ha kane ka sngi plie ia kane ka prokram ai jinghikai la ia don lang u Bah Cyril Diengdoh, Commissioner and Secretary General Administration Department, ka Deputy Commissioner kong RM Kurbah, u Director ka Army Recruitment Office u Col Vinay Kumar, u Additional Deputy Commissioner Bah S Warjri, u retired Lt Col S Marbaniang, Zila Sainik Welfare Officer bad kiwei.

Haba kren sha ki samla kiba thrang ban iakhun ia ka kam shipai, u Bah Cyril Diengdoh u la pynpaw halor ka jingkordor ban ioh rung sha ka kam shipai Indian Army, kata ym tang kum ka kam hynrei ka lad ka kabu na ka bynta ki samla ban long kiba don ia ka akor bad ka burom. U la pynshlur ruh ia ki samla ba kin wan iashim bynta tista sha kane ka training khnang ba kin lah ban pyndep ia ka Common Entrance Exam bad ka Physical fitness test kumjuh.

Ka Kong RM Kurbah Deputy Commissioner ha ka jingkren ka la kdew ba kane ka jingai jinghikai ka bym donkam jinglut jingsep ka dei kaba la shimkhia da ki bor pyniaid District ban iarap pyntbit ia ki samla ba kin ioh ia ka jingshemphang khnang ba kin lah ban pass ia ka Entrance Exam bad ia ka Physical Test. Kumta ka kyntu ia ki samla ba kin minot ban wan sha kane ka training khnang ba shisien ka sngi kin ioh ban don bynta lang ha ka tnad shipai Indian Army.

Katba na ka liang u Col Vinay Kumar u la ai ka jingbatai sha ki samla halor ka kam shipai Agniveer ha kaba u la ai ruh ia ki jingtip ba kongsan shaphang ki jingdonkam ban shah jied bad kumjuh ruh ka rukom ban jied ia ki samla bad kumjuh ruh ka jingmyntoi kiba ki ioh.