Sdang ka District Level Inter School Athletic Meet u DSO Jowai

Syllad | The Rising MeghalayaMay 11, 2022

Ka District Level Inter School Athletic Meet 2022 kaba pyniaid da ka Ophis u District Sports Officer, West Jaintia Hills District ryngkta ka jingiatreilang bad ka West Jaintia District Sports Association (WJDSA) kala sdang haka sngi Balang ha madan Kiang Nangbah Stadium.

Kane ka lympung kaba la sdang mynta ka sngi kan kut haka 13 tarik une u bnai.

U Additional Deputy Commissioner, West Jaintia Hills P K Boro kum u kongsan ula plie paidbah ia ka lympung ialehkai ki khynnah skul haka jingiadonlang ka District School Education Officer Kong P Syiem, District Sports Officer Ma K Passah, Members bad ki nongialam ka WJDSA.

U Boro ula kyntu ia ki khynnah ban iashimbynta ha kane ka lympung da ka mynsiem ialehkai sports bad kitbok kitrwiang ia baroh ki nongshimbynta.

Ula pynher iaka lama ka tnad sports kumka dak ban plie ia kane ka meet. Hadien pat kala don ka jingshim jingkular da ki nongialehkai.

Haduh 17 tylli ki skul kila shimbynta ha kane ka lympung bad ki jingialehkai ki kynthup iaka jingmareh 100mtr,400 mtr, 600mtr, 1500mtr, 4×100 mtr, High Jump, Long Jump, Discus throw, Javelin throw bad shot put.