Sdang ka Behdeinkhlam Tuber, khot wer sngewbha ka Seinraij Tuber ia baroh

Syllad | The Rising MeghalayaJuly 19, 2025

U President jong ka Seinraij Tuber, u Ma Helping Phawa ula pyntip ba kumba ju long manla u snem mynta ka kynti ruh ka Seinraij Tuber kan pyndep iaka lehniam Behdeinkhlam kaba la sdang mynta ka 19 tarik bad kan kut haka 22 tarik Naitung ha Tuber Kmaishnong, East Jaintia Hills District.

Kumta na ka liang jong ka Seinraij Tuber ka khot ka wer ia baroh ki khun ka bri u Hynniewtrep ban wan sakhi ia kane ka jinglehniam Behdeinkhlam kaba heh tam hapoh ka jylla Meghalaya.

Na kaliang ka Seinraij kala pyntip ba ha kane ka sngi ym shah ia ki nongdie jingdie ban die mar ne jingbam harud surok ne ha footpath. Kino kino ki nongdie kiba wan die jingdie ki hap ban ioh bor na ka Seinraij Tuber bad ka dorbar shnong Tuber Kmaishnong khnang ba kan ym pynthut ne pynwit ia ki lynti ki syngkieng.

Ha kine ki saw sngi saw ia kin don ki jingleh niam bapher bapher ryngkat ka suit ka shor. Kan don ka jingai ‘pyrnah pyrjin’ hadpeng ki nongshong shnong ki ba dang bat dang ksoh iaka Niamtre ban ai khublei Behdeinkhlam iwei ia iwei da ka jingiakynduh mar kylliang hapdeng ka phang ‘Wah’ bad phang ‘Nein’.

Haka sngi kaba lai, Musiang dang step naduh ka por 5 baje u Langdoh ryngkat bad ki Wasan Raij kin pyndep ki iaka Kñia Syiem Ryngkaw ha Mukoi Ryngkaw. Hadien bala dep Kñia bud saka Rah Bhang Blai bad ka Chooh Thyndai. Iaka Chooh Thyndai hap pyndep ha shwa ban beh iaka khlam da u Langdoh bad ki Wasan Raij.

Haka sngi khatduh ka Behdeinkhlam kaba dei ka Muchai, u Chutia un hap ban pyndep iaka Niam Kñia beh khlam. U Langdoh bad ki Wasan ki ai Klong Pyrnah sha ki dong ki shnong kiba shna Rong bad ki Seiñraij Shnong bapher bapher.

Hashuwa ban bret iaki rong ka don ka lehniam Yabooh bad Yatan Bhang Blai.  U bhang u dei u dieng uba don ar pnat uba ki pyndonkam pat ha ka rukom kaba ki khot ka ïatan bhang. Ka ïatan bhang ka ïasyrïem ïaka Dat Lawakor ha ka Behdieñkhlam ka Raij Jowai ha kaba un bha u kba u khaw sha ka liang kaba jop ha kata ka jingïatan.

Yn pynkut iaka Behdeinkhlam da kaba jingiasleit ne ialympat Niam hapdeng ki ar ngut Rang kynsai ka Phang Wah pyrshah iaki Rangkynsai ka Phang Ñein.