Sdang ka 2nd Division Football ka EJHDFA

Syllad | The Rising MeghalayaJuly 17, 2025

Ka lympung ialehkai 2nd Division Football League kaba pyniaid da ka East Jaintia Hills District Football Association (EJHDFA) kala sdang haka madan artificial turf Diengshynrum, Khliehriat haka 16 tarik Naitung.

Ha kane ka sngi sdang ka Mulieh YWSC bad ka Lakadong Umlatdoh SSC kila khur namjop, katba ka SWO Moosiang Lamare Old kala iakhaid bad ka Moolamanoh SC.

Haka jingialehkai kaba nyngkong ka Mulieh YW SC Suchen kala pynliem da 2-0 iaka Moosiang Lamare New YWO SC. Ia kine ki ar kol la thep da u Piles Sumer (9) bad Firterjoy Pariat (13).

Ka jingialehkai kaba bud kala kut da ka jingiakhaid 1-1 hapdeng ka Moosiang Lamare Old SC pyrshah iaka Moolamanoh SC. Iaka kol jong ka Moosiang Lamare Old SC la thep da u Primi o Muksor (39), katba iaka kol jong ka Moolamanoh la thep da u Pressamla Syrti (OG) 78.

Ha kawei pat ka jingialehkai ka Lakadong Umlatdoh SSC kala pynliem iaka Dkhiah West SCSO da 2-0 lyngba ki kol ba la thep da u John smill Amkhloo (23) bad Pynshaibha Amkhloo (70).

Ia kane ka lympung ialehkai la plie da u kongsan Ma Joshwa Sajem Vice President East Jaintia Hills District Football Association (EJHDFA) haka jingdonlang ki nongialam bad nongkitkam ba kynthup ia u Ma Mehiwot Shadap Working President, Ma James Sutnga General secretary, Ma Wilbert Nongtdu Working President Tournament, Ma Embhahlang Lamurong Secretary Tournament bad Rymphang Nongtdu nalor kiwei kiwei.

Ha kane ka sngi u kongsan ula ai sngewbha da ki sopti jersey sha baroh ki referee ba pyniaid iaka jingialehkai.

Haka 17 tarik Naitung ka jingialehkai kan long hapdeng ka Dienshalalu SC pyrshah iaka Khliehmyntriang SCSC haka por 10:45 baje mynstep, Wapung Skur SSWO pyrshah iaka Wapung Shnong SSC haka por 1.00 baje nohphai sngi, Khliehriat West FC pyrshah iaka Tuberkmai Shnong SSC haka por 3:15 baje nohphai sngi.