Saw snem kynthih ioh rung ka USTM ha ka thup ki Univeristy ba pawkhamt ka ri India

Syllad | The Rising MeghalayaSeptember 5, 2025

Ka University of Science and Technology Meghalaya (USTM) ka la ioh ia ka jingjop da kaba ioh rung biang ha ka thup napdeng ki 200 tylli ki University kiba hakhliehduh jong ka ri India (151-200) haka sien kaba saw ha ka National Institutional Ranking Framework (NIRF) 2025.

Kane ka jingithuh ka long ka jingpynshisha ia ka jingaiti jong ka skulbah USTM ha ka jingnang jingstad bad ka jingpyrshang ba khlem sangeh jong ka ban thaw ia ki jingmut kiba thymmai.

Ka jingpynbeit kyrdan jong ka NIRF ka dei kaba pynshong nongrim ha ki jingpeit bniah ba pyrkhing ha baroh ki bynta, kata kynthup ia ka jinghikai bad jingpule, ka jingwad bniah bad ka jingtreikam kaba tbit, ki jingmih na ki jingpynkut ia ka jingpule bad kiwei kiwei ki bynta.

Ka jingtreikam kaba beit jong ka USTM ha kine ki bynta ka la pynlong ia ka ba kan ioh ia ka kyrdan ba halor hapdeng ki skulbah ba pawkhmat hapoh ka ri. Kum ka skulbah shimet kaba nyngkong bad ba marwei ha ka thain Shatei Lammihngi ban ioh pdiang ia kane ka kyrdan, ka USTM ka la pynpaw shisha ia ka jinglah bad ka jingkongsan ka jong ka.

“Ka jingkhublei ka long ia ka Sorkar Meghalaya na ka bynta ka jingkyrshan kaba khlem sangeh naduh ka sngi kaba nyngkong, ia ka jingialam ba tbit bad iohi jngai jong u Chancellor Mahbubul Hoque bad u Vice Chancellor Prof. G.D. Sharma kiba ka jingpyrshang ba khlem sangeh jong ki ka dang bteng ban kyntiew shaphang ia ka USTM,” ong ka University lyngba u kyrwoh.

Mynta ka USTM ka don ia ka jingthmu ban poi sha ka kyrdan kaba 50 napdeng ki skulbah ha India hapoh une u snem u ban wan lyngba ka jingkyrshan kaba iai bteng na ka liang ka Sorkar Meghalaya.