Sangeh shipor ka VPP ban iakhih halor Meghalaya Lokayukta, ka tohkit bamsap, khot iakren ka sorkar

Syllad | The Rising MeghalayaJanuary 22, 2024

U President ka Voice of the People Party (VPP) haka sngi Nyngkong ula pynbna ba ka party kala rai ban sangeh shuwa shipor iaka jingiakhih thungkam biang iaki ophisar Meghalaya Lokayukta hadien ba ka sorkar kala rai ban khot iakren iaki nongialam ka party.

Kane kala wan long hadien ba u Bah Ardent bad lai ngut ki MLA bad ki nongkyrshan ka party kila mih biang sha surok ban bteng biang iaka jingiakhih shong kyllain myngngor ban pynbor iaka sorkar ban thung kam biang iaki lait ngut ophisar kiba la shah weng na ka Meghalaya Lokayukta.

U Bah Ardent ki wei ki nongialam ka Party kila thmu ban tur biang shajan Secretariat, hynrei kila shah khang lynti ha ki bor pulit bad magistor ha Additional Secretariat.

Hadien katto katne por bala iaid ka jingiakhih ka VPP, ka sorkar MDA kala khot iakren iaki nongialam ka VPP lyngba ka Myntri Kong Ampareen Lyngdoh.

U Bah Ardent hadien kane ka jingiakren ula pyntip paidbah ka sorkar kala khot ia kren ban iatai halor kane ka kam bad shen kan don ka jingialang hapdeng u Chief Minister, Myntri ka tnad ain, ki ophisar bad ki shnat sorkar ba donkam ban pynbeit ia kane ka kam.

Ula pyntip ruh ba ka VPP kala rai ban sangeh shuwa shipor ia kane ka jingiakhih bad yn ap ia u soh ba mih naka jingiakren.

U Bah Ardent ula ong ba ka jingiakhih jong ka VPP ka dei namar ba shah ktah Meghalaya Lokayukta, kaba tohkit iaka kam bamsap bad ban pynshitom ia ki nong bamsap, kumta lada don ba ktah iaka Lokayukta ka VPP kan ieng ban pyrshah bad ban pynbeit ban pynkhlain iaka Meghalaya Lokayukta.

Shuh shuh ha kaba iadei bad ka expert committee halor ka bhah thung kam jam, ula ong ka VPP kan sa phah iaka jingpynkynmaw iaka sorkar halor ka expert committee, namar ba nakaliang ka party kala aipor 6 bnai bad mynta 4 bnai, kala iaid. Ula pyntip ruh ba ka VPP kan buddien iaka jingeh ki samla pule naka daw ka CUET bad ban pynbiang iaki centre ha Jylla.