Sangeh biang ka khaii pateng ha Dawki LCS, pyrshah ki shnong bad sengbhalang

Syllad | The Rising MeghalayaAugust 3, 2020

Ka kynhun jong ki sengbhalang bad ki nongialam shnong jong ka War Jaintia kila mih paidbah biang ha Tamabil, Dawki ban pyrshah iaka jingthmu sdang iaka khaii pateng hapdeng ka India bad Bangladesh mynta ka sngi.

Kine ki sengbhalang ki kynthup iaka Khasi Students’ Union (KSU) War Jaintia Circle bad South Central East Circle, ka Hynniewtrep National Youth Front Southern (HNYF), Riwar Circle, ka Federation of Khasi Jaintia and Garo People (FKJGP), War Jaintia Circle, katba ki shnong hapoh ka jingialam u Waheh Shnong Dawki Mankhraw Ryngksai, Waheh Shnong Lamin Golden Gashnga bad u Secretary jong ka Sohkha Shnong Forme Sumer bad kiwei kiwei kila hiar sha Tamabil Dawki ban pyrshah iaka jingkhaii pateng lyngba ka kad khaii Tamabil Dawki LCS.

“Na ka liang jong ngi ki sengbhalang bad ki bor shnong ngi pyrshah jur ia kane ka jingkhreh plie jubor ka sorkar ia ka kad khaii Dawki LCS namar ba ym shym la pynbiang iaki lad jingiada na ka khlam Coronavirus,” la ong u Lurman Talang, general secretary KSU War Jaintia.

Ki nongialam shnong ka thain war kila kynnoh ka sorkar kala thombor bad leh jubor khlem da kynjoh ktien iaki nongialam shnong ka War Jaintia ban plie iaka kad khaii bad bankhaii hapdeng ka India bad Bangladesh bad lada jia eiei ne pur ka khlam sha katei ka thain ki nongialam shnong ka War Jaintia kila ong ba kim don jingkitkhlieh.

Ka Additional Deputy Commissioner, incharge Amlarem Civil Sub Division ka kong JU Kharpuri kaba la hiar sha Dawki LCS kala iakren bad ki nongialam sengbhalang bad ki nongialam shnong bad kala ong ba kan pynsngew ia kane sha u Deputy Commissioner jong ka District, la ong u Laitphar Syngkrem president KSU War Jaintia Circle.

Ula ong shuh shuh ba haduh mynta na ka liang jong ki kim pat shah khot ban iakren halor ka jingplie khaii pateng bad ka Bangladesh ha u Deputy Commissioner West Jaintia Hills Dstrict. Ha manla ki jingialang kiba la long ka KSU, FKJGP, HNYF bad ki bor shnong ha khappud India Bangladesh ki ieng ban pyrshah namar ka jingduna ki lad jingiada naka khlam COVID-19 .

“Mynta ka sngi ngi la sakhi ba watla ka India kala thmu ban phah ne pynrung iaki kali kit mar sha Bangladesh, hynrei ka sorkar Bangladesh kala kyntait ban pdiang ia kitei ki mar namar ba kam pat long kaba la pynkhreh bad wat ki medical team ruh kam pat buh satia ha ka khyrdop jong ka,” la ong u Laitphar bad bynrap baroh ki nongialam shnong bad ki sengbhalang kim pyrshah iaka jingkhaii pateng, hynrei ban pynbiang ia ki lad jingiada ban tem iaka khlam COVID-19.

U Rangbah Shnong jong ka Lamin Golden Gashnga, ula ong ba ia mynta dei ban khang shwa shipor ia ka khaii pateng bad ka ri Bangladesh bad wat pynbor iaki shnong ban mih paidbah. Ula ong baka bor synshar district ka dei ban khot ka jingialang hadpeng ki sengbhalang bad ki nongialam shnong ban iakren sani halor kane ka kam plie khaii pateng bad ka Bangladesh.