Sam paidbah u MLA Nongkrem iaka skhim ba T.2.50 klur na ka SRWP & ISYDP

Syllad | The Rising MeghalayaJuly 23, 2024

U MLA ka Nongkrem constituency u Bah Ardent Miller Basaiawmoit haka 23 tarik Naitung ula sam paidbah ia ka skhim SRWP bad ISYDP sha ki paidbah nongshong shnong jong ka constituency.

Kine ki kynthup ia ka T.2.50 klur na ka skhim SRWP bad T.3 lak na ka ISYDP kaba dei na ka bynta u snem 2023-2024.

Na ka skhim SRWP 2023-2024, u MLA ka Nongkrem ula mang T. 45 lak na ka bynta 60 tylli ki longiing ba duk, kata mar T. 75,000 kawei ka longing, mar T.25,000 sha kawei ka longiing na ka bynta ban pynbha ne pynkha kamra thymmai, mar T.10,000 sha ki 500 ngut ki nongsengkam lajong bad nongkhaii, bad la mang T. 20 lak na ka bynta ka skul Pomlakrai Presbyterian Secondary School, Pomlakrai Mawtharia.

Nalor kata la mang ruh T.12.50 lak na ka bynta ka Lumkynsai Presbyterian L.P & UP School, Smit, T.15 lak ia ka Nongkrem Presbyterian Secondary School, Nongkrem Mawpynthaw,  T.10 lak ia ka St John Bosco, Laitkor Mawrie, T.10 lak ia ka H. L. Mizo L. P. School Madanrting, Them Basuk, T. 25 lak ia ka Hedrik Memorial Unitarian Upper Primary School, Nongkrem Nongkyndong, T. 15 lak ban pynbha ia ka Laitkor football ground, T.15 lak na ka bynta ka Mawpynthaw Football ground bad T.50 lak na ka bynta ka Reach Shillong Ministries School Laitkor Mawarliang.

Katba lyngba ka skhim ISYDP  2023-2024, u MLA ka Nongkrem ula mang T.50,000 ia ka Madanrting Sports Club, T.50,000 ia ka Pomlakrai Sports Club, T.50,000 ia ka Dongmusa Umphyrnai, T.50,000 ia ka Smit Sports Club, T.50,000 ia ka Umphrup Sports Club bad T.50,000 ia ka Nongkrem Sports Club.