Sakhi ka jylla haduh palat 5,100 tylli ki kam sniew haki lai snem ba la dep: Dy CM

Syllad | The Rising MeghalayaSeptember 19, 2023

Ka jylla Meghalaya ka la sakhi haduh kumba 5,196 tylli ki kam sniew kam bymman bapher bapher ia kiba la rejistar ha kine ki lai snem ba la dep, kata naduh u 2020 haduh u 2023.

Ia kane la pyntip da u Symbud Myntri Rangbah ka jylla uba khmih ia ka tnat Home (Police) u Bah Prestone Tynsong haba jubab ia ka jingkylli ba la wanrah da u MLA ka UDP na Nongpoh u Bah Mayralborn Syiem hapoh ka dorbar Assembly mynta ka sngi ba Ar.

Na ka liang u Bah Syiem u la pan ruh ka jingpynthikna na u Dy CM halor ka jingdonkam ban pynkloi ia ka jingtohkit bad ban pynngat ne chargesheet ia ki briew kiba donkti ha ki jingjia ne ki case kiba dang sahteng. U la ong ruh ba ki la don haduh kumba 2,821 tylli ki kam sniew bapher bapher tang ha kine ki lai snem ba la dep ha kaba tang 84 tylli la lah ban pyndep ia ka jingbishar.

Haba jubab ia kane u Bah Tynsong u la pdiang ba ka long kaba i duh mynsiem namar ka jingshim por na ka bynta ban tian bisahr bad pynngat ia ki nongleh kam bymman. Watla katta u la ong ba ki bor pulit ka jylla ki la shim ia baroh ki sienjam ban pyndep ha kaba iadei bad ka jingpynngat bad ban phah iakane shapoh ka iingbishar ban pyndep ia ka jingtian bishar.

“Nga kwah ban pynthikna ba ki bor pulit bad ka sorkar kin ym shong klikti halor kane ka phang.Ngin shimkhia halor kane ka bynta bad pynthikna halor ki sienjam hapoh ki iingbishar ban pynkloi ia ka jingshim bishar,” ong u Bah Prestone.

Ha kajuh ka por u la pyntip ruh ba ka sorkar jylla dang shen ka la thaw la ka jong ka directorate of forensic hapoh ka jingkhmih jong ka Tnat kam pohiing da ka jingthmu ban pynkloi ha kaba iadei bad ki jingtreikam kiba iadei bad kane ka bynta.

U la ong ruh ba ki don katto katne ki jingtyrwa ba la phah na ka bynta ban pynkhlain ia ka jingtreikam jong kane ka tnat bad na ka liang ka sorkar ruh ka la dep ban ai ka jingmynjur halor kane ka jingtyrwa.U la ban ruh ba ki la dep ruh ban ioh pdiang ia ki katto katne ki kor ki bor ba donkam khnang ban pynthikna ban pynkloi ia ka case kiba dang sahteng bad ruh ba kin ym donkam shuh ban phah shabar ka jylla na ka bynta ka jingleh ia ki test khnang ban pynlong ia ka jingtohkit.

Ha kaba iadei bad ka jingduna nongtrei hapoh ka tnat pulit, u Bah Tynsong u la pyntip ba dang shen ki la pynlong ia ka jingialang hapoh ka jingialam jong u Myntri Rangbah ka jylla u Conrad Sangma ha kaba ki la shim ia ka rai ban pyndap ia ki jingduna hapoh ki SP office, police station kynthup jong ki kynthei bad ki police outpost ha baroh ki bynta jong ka jylla.