Sahkut lut ki kali namar ka jingtwa khyndew ha ka surok bah NH-6 ha Dona Skur

Ka jingtwa khyndew kaba jur kaba la wan jia kynsan haka janmiet sngi U Blei ha ki bynta jong ka surok bah National Highway- 06 ha Dona Skur, East Jaintia Hills ka la pynlong ia baroh ki kali kiba iaid lyngba ba kin sahkut lut hajuh.
Ka Tnad pulit ka pyntip ba kane ka surok bah ka la shah khangdam na kane ka jingtwa khyndew kaba jur ha kaba ka la aijingmut ia ki nongleit nongwan ba kin pyndonkam noh da kiwei pat ki lynti iaid tad haduh ban da dep pynkhuid ia kane ka jaka.
Watla kam shym la don kano kano ka jingjia ba sngewsih ha kane ka jingjia, hynrei ka la ktah jur ia ka leit ka wan jong ki kali lyngba kane ka surok kaba kongsan kaba pyniasoh ia ka Meghalaya bad ki thain shathie ka Assam lem bad kiwei pat ki jylla ka thain Shatei Lammihngi.
Kane ka surok ka dei ka bynta jong ka surok bah NH-06 kaba la don lypa bad kaba la bteng ban mad ia ki jingjia twa khyndew khamtam ha ka por lyiur.
Lah ban kdew ba kane ka bynta jong ka surok ka dei ka bynta kaba hap ha ka greenfield highway project kaba la mang thymmai ha ka jinglut kaba T.22,864 klur na Mawlyngkhung na Meghalaya sha Panchgram ha Assam bad kaba thmu ban pynduna ia ka jingkhapngiah kali bad kyntiew ia ka lad pyniasoh ha ki thain.
La khmih lynti ba kane ka surok kan iaid lyngba ia ki jaka dewiong bad karkhana dewbilat ha Meghalaya bad ka ban kyntiew ia ka jingpyniasoh sha ka jylla Tripura, Mizoram, Manipur bad ka Barak Valley jong ka Assam.
Leave a Reply