Sa kawei ka madan artificial turf yn shna ha East Jaintia

Syllad | The Rising MeghalayaMay 4, 2024

U Myntri Sorkar bad MLA ka Khliehriat, u Bah Kyrmen Shylla ula pyntip ba u sngewkmen ban iathuh ba u Myntri ka tnad sports ka Jylla ula ai ksai ban pynioh sa kawei ka madan Artificial Turf iaka East Jaintia Hills District.

Ia kane ka madan artificial turf ka ban don ryngkat ka synthetic track bad gallery yn tei ha Wapung Shnong, la ong u Bah Kyrmen Shylla haba plie iaka football coaching camp ka Kynsai Football Programme kaba pyniaid da ka Kyrmen Foundation da ka jingiateh bad ka Rangdajied United Football Club ha Khliehriat haka sngi Saitjain.

“Ka East Jaintia Hills District kan sa ioh ruh iaka Indoor Stadium kaba yn tei ha Diengshynrum hynrei iaka jaka ban tei yn ieh haka jingstad jong ki synjuk ialehkai ka district,” la ong u Bah Kyrmen.

Haba kren shuh shuh u Kyrmen ula pyntip ruh ba ka Kyrmen Foundation kan aikhusnam ruh iaki khynnah kiba tibit bad kiba don sap kiba pyni iaki sap ki phong jong ki ha ki rynsan social media bad ula kyntu iaki kmie ki kpa ban don ryngkat bad ki khun haka por shah hikai khnang ba kin ioh ban ringdur haka por ba ki khun ki pyni iaka skill kaba long kawei na ka lad na ka bynta jong ka jingiakop.

U trai jong ka Rangdajied United FC u Bah Eugeneson Lyngdoh uba dei u rangialalehkai ba pawnam ka ri India, haka jingkren u pynpaw ka jingkmen ban iohi ba ka Kyrmen Foundation ka don iaka jingthmu kaba bha tam ban plie lad plie lynti iaki heprit jong kane ka thain.

“Ka sap kaba U Blei ula ai, wat pynlehnoh ei iaka namar kumba ka long mynta ka phutbol kadei kawei na ka lad ka lynti ymtang ban wanrah iaka kamai kajih hynrei ka wanrah ruh iaka jingbit jingbiang haka met ka phad khamtam eh ha ka jingiadei bad ka imlang sahlang,” la ong u Bah Lyngdoh.

Ula pyntip ruh ba ki Coach ki ban hikai iaki khynnah ki long u Bah Presence Bareh uba long u Head Coach jong ka Rymbai Shkenshynriah, u Bah Marlangki Suting bad Bah Poibiang Pohshna kiba dei ki rangialehkai kiba la mihkhmat na ka ri India haki lympung ialehkai bapher bapher.

Kiwei kiwei kiba kren ki kynthup ia Lasky Rymbai Dy CEM JHADC, Bah Finlyness Bareh MDC Rymbai, MLA barim Bah Justine Dkhar bad kiwei kiwei.