Sa 2 sngi ai por ka iingkashari ban tohkit ia ka Sonam bad u Raj, 3 ngut sha judicial custody

Syllad | The Rising MeghalayaJune 20, 2025

Ka iingkashari Chief Judicial Magistrate (CJM) haka 19 tarik Jylliew  ka la ai por sa 2 sngi ia ka Special Investigation Team (SIT) ban set ia ka Sonam Raghuvanshi bad ia uba ieit jong ka u Raj Kushwaha ha ka Police Custody, katba ia ki 3 ngut kiwei pat kiba donkti lang halor ka jingshah pyniap u Raja Raghuvanshi la la phah set 14 sngi hapoh judicial custody.

Baroh kine ki runar kiba donkti ha katei ka kam pyniap ia u Raja Raghuvanshi ha ka thain Sohra la wanlam tian bishar biang hapoh ka iingkashari hadien ba la kut noh ka police custody kaba 8 sngi kynthih.

“Hadien ka jingkyrpad ngi la ioh bor sa 2 sngi ban set ia ka Sonam bad u Raj hapoh police custody, katba ia ki laingut kiwei pat ki runar kiba kynthup ia u Akash Rajput, u Vishal Singh Chauhan bad u Anand Kurmi la phah set 14 sngi hapoh judicial custory,” ong u Superintendent of Police ka East Khasi Hills, u Bah Vivek Syiem haba kren sha ki lad pathai khubor.

Ha ka 17 tarik Jylliew ka SIT ka la lah ban pyndep ha kaba iadei bad ka jingleit pynwandur biang ia ka kam pyniap ha kaba la lapdien biang sa ia kawei pat ka tiar pyniap kaba ar na kshaid Weisawdong.

Ka SIT kala leit ruh ha kylleng ki jaka naduh ka jaka pynieng kali ha Mawlakhiat, ka jaka ba u Raja bad ka Sonam ki pynieng ia ka scooty kaba ki la shim wai, bad ruh ha ka jaka pynieng kali ha Kshaid Weisawdong ka jaka ba la jia ka kam pyniap.

Katkum ka jingiathuh ki pulit kine ki runar ki la pyniap ia u Raja ha ka jaka pynieng kali hajan ka kshaid Weisawdong bad bret ia ka met jong u ha ka jaka riat ba jylliew kaba don marjan ha ka 23 tarik u Jymmang ba la dep.

Une u heh pulit u la ong ruh ba ka kynhun ki pulit ka jylla mynta ka dang don sha Indore ban pynlong ia ka jingtohkit ha kaba iadei bad kane ka jingjia khamtam ia kiba haiing jong ka Sonam Raghuvanshi.

“Ngi la dep ruh ban kylli jingkylli ia u Govind Raghuvanshi bad ia ka kmie jong u bad mynta ki la pynthikna mano ba niah ia ka kali bad mano ba la ialam ia ka Sonam sha Uttar Pradesh, u la bynrap.

U SP u la ong ruh ba u Sanjay Verma u dei tang ka kyrteng thok, kaba ha ka jingshisha la register ha ka true caller hynrei u nombor u dei u jong u Raj Kushwaha hi.