Sa 11 ngut kiba dang sahkut ha ka krem dewiong ha Umrangso: La pynsangeh shwa ia ka kam aijingiarap, shah kem u trai

Syllad | The Rising MeghalayaJanuary 8, 2025

Ia ka kam pyllait im ia ki briew kiba dang sahkut hapoh ka krem dewiong beain ha Umrangso jong ka Dima Hasao district ka Assam la pynsangeh shwa haka janmiet 7 tarik Kyllalyngkot bad yn bteng bteng ha ka step 8 tarik kaba bud.

Wat hapdeng ka jingpyrshang borbah da ka Tnad NDRF, SDRF, shipai Indian Army, Navy, Assam Rifles bad ka Tnad Fire & Emergency Services hynrei ym pat shym la lapdien satia ia ki met na katei ka krem ha kaba ki dang don sa kumba 11 ngut ki nongtrei par kiba dang sahkut shapoh naduh ka step sngi Nyngkong ba la lah.

U heh na ka Tnad Assam Disaster Management Authority (ASDMA) u la ong ba ka jingkiew jong ka um hapoh katei ka par dewiong ka la kynjoh haduh jan kumba 100 phut bad kaba la pynthut ia kane ka kam aijingiarap. La iohi ruh ia lai tylli ki met iap hynrei ym pat shym la lah ban sei namar ki jingiakynduh jingeh.

Ka kynhun na ka tnad shipai duriaw kaba kynthup ia ki nongngam um na ka Eastern Naval Command ki la wan poi hynne ka janmiet sngi ba Ar na ka bynta ban aijingiarap.

Lah ban kdew ba napdeng ki 27 ngut ki nongtrei par kiba la sahkut hapoh katei ka krem dewiong 10 ngut na ki, ki la lait im katba hapdeng ka 13 haduh 17 ngut ki dang jah rngai. Kine ki nongtrei par kiba dang sahkut ki kynthup ia ki nong Assam, West Bengal bad na Nepal.

Ki bor pulit ki la kem noh ia u Punish Nunisa ia uba la kynnoh ba u dei u trai jong katei ka par dewiong ba beain kumjuh ia uba shipara arkmie bad ka kurim jong u Chief Executive Member (CEM) ka Dima Hasao Autonomous Council, u Debolal Gorlosa.

Halor kane ka jingjia la mudui ruh da ka ehajar hapoh Umrangso PS case no. 02/2025 hapoh ki kyndon jong ka Mines and Minerals (Development and Regulation) Act, 1957.

Ki khubor ki iathuh ba katei ka par dewiong ka dei kaba la pyntreikam beain ha kaba la kynnoh ba la leh ruh da ka jingtip jong ki  bor sorkar ka thain.

Ki kam aijingiarap ki la sdang hadien 24 kynta ba katei ka jingjia ka la dep jia kaba la pynmih ruh ka jingshah kynthoh kaba jur pyrshah ia ki sienjam ba la pynkhreh da ki bor pyniaid district.

Na ka liang u Myntri Rangbah ka Assam u Himanta Biswa Sarma ruh u la pynthikna ia ka jinglong beain jong kane ka par dewiong bad u la pan ruh ia ka jingiarap na u Myntri ka Sorkar Pdeng uba khmih ia ka kam dewiong  u Kishan Reddy uba la bthah ia ka Coal India HQ ban ai jingkyrshan.