Ryngkat ka puh shilum leit pynjulor ka kynhun ki briew ia ka lyngkha kba jong ka longkmie ha Mowkaiaw

Syllad | The Rising MeghalayaOctober 3, 2023

Ka Kong Daroilang Lapasam kala mudui da ka jingujor ejahar pyrshah iaka kynhun ki briew kiba wan ban pynjulor iaka lyngkha kba jong ka da ka puh shilum ha ryngkat ka byngrem byrsit haka shnong Mowkaiaw, West Jaintia Hills District haka sngi Nyngkong.

Katkum ka jingmudui ejahar bala ujor kane ka long longkmie la kynnoh ba kane ka kynhun jong kine ki briew kiba naka shnong Mowkaiaw kila wan ban pynjulor iaka lyngkha haka jingialam jong u Ma Shaniah Lamare, u Ardamirang Rymbai, Franklin Hadem, Humaialang Lapasam, Dangawansuk Sungoh, Loving Laloo bad u Jim Hadem bad kiwei kiwei.

Kane ka jingjia shah pynjulor jong katei ka lyngkha kba jong kane ka longkmie kaba dei na ka shnong Mowkaiaw ka la jia ha ka 2 tarik mynta u bnai ha ka por kumba 10:30 mynstep ha kaba kine ki briew ki la wan ha ryngkat ki wait bad ki tiar pynmynsaw nalor k kali JCB ka bym don ia u registration number kaba dei trai da u Ma Rishanmi Suting ban leh ia kane ka kam thombor.

Halor kane ka jingjia na ka liang ka Kong Daroilang Lapasam ka la leit ruh ban ujor shapoh Raliang Police Station, pyrshah ia kine ki briew kiba donkti ha kane ka kam thombor da kaba pynjulor ia u kba uba la dei ka por satang ban ot noh tang hadien katto katne taiew.

Kane ka longkmie ka la ong ruh ba kane ka jingjia  ka la wanrah ka jingduh nong kaba khraw ia baroh kawei ka iing ka sem kaba la trei shitom ban thung bad ban sumar ia une u kba uba ki la rep ha katei ka lyngkha kaba don ha Umrashlum.

Nalor kata ka la ong ruh ba ka la pyrshang ban khanglad ia kine ki briew ba kin ym pynjulor ia u kba da kaba iakren iasngewthuh, hynrei kila beh ia ka bad maham tyngeh da kaba ktahkti ha ryngkat ka byrngem byrsit da ki ktien khlem akor

Kumta na ka liang kane ka longkmie  ka la kyntu jur ia ki bor pulit ba ki dei ban kem mardor ia kine ki briew kiba donkti ha kane ka kam thombor bad ban pynshitom katkum ka ain.

kI Pulit ka Raliang kila register iaka case bad ka jingtohkit kala iaid shakhmat.