Rung semifinal ka Sutnga Mission bad ka Musniang haka 2nd Div ka EJHDFA

Syllad | The Rising MeghalayaSeptember 24, 2024

Ka Sutnga Mission SSCC bad Musniang SC kila lah ha kaban buh jaka ialade haka kyrdan semifinal jong ka 2nd Division Football Tournament kaba pyniaid daka East Jaintia Hills District Football Association (EJHDFA).

Kane ka la wan hadien ba kine ar kynhun kila khur namjop haka jingialehkai quarterfinal pyrshah iaka Deinshalulu bad ka Lakadong Umlatdoh kaba la long ha madan artificial turf Diengshynrum ha ka 24 tarik Nailur.

Ka Sutnga Mission SSCC kala jop da 2-1 iaka Deinshalalu. Ia kine ki ar kol la thep da u Greatstar Pajuh (31) bad u Welson Pala (54) kaba la pynlong iaka Sutnga ban tam lypa shakhmat da ar kol ha kane ka jingiakhun kaba la ai mynsiem iaka kynhun baroh kawei. Ka Deinshalalu kala wan nadien ba thep ia kane ka shikol lyngba u Dimon Ksih (67).

Haka jingialehkai kaba bud, ka Musniang SC kala pynliem da 3-1 iaka Lakadong Umlatdoh SCSC.

Na kaliang ka Musniang SC, ia kine ki kol la thep da u Michael Rymbai (10, 16) bad u Rusimiki Rymbai (32). Shikol ka Lakadong Umlatdoh la thep da u Wanki Syad (76).

Da kane ka nam jop ka Sutnga Mission SSCC bad Musniang kila kiew syndon shaka kyrdan 1st Division haka aiom ialehkai ban wan.