Rung semifinal ka Rangdajied United FC haka Shillong Premier League

Syllad | The Rising MeghalayaApril 22, 2024

Ka Rangdajied United FC ka la kylla long ka Club kaba nyngkong ka ban ioh rung sha ka semifinal ha ka jingialehkai Shillong Premier League hadien ba ka la lah ban pynrem noh ia ka Nangkiew Irat SC da 2-1 ha ka jingialehkai kaba la long haka 22 tarik Iaiong ha madan SSA Stadium Polo, Shillong.

Ha kane ka jingialehkai kaba mar ia biangbor, ka Rangdajied ka la ioh ban pynkhih jar nyngkong lyngba u Ieitlang Syiemlieh ha ka minit kaba 45 jong ka kylla step.

Haba bteng ia ka jingialehkai ha ka kylla miet ka Nangkiew Irat ka la ioh ban pyniakhaid lyngba ka kol ba la thep da u Flavius Lalruakima ha ka minit kaba 77.

Hynrei, ha kaba khatduh ka Rangdajied ka la ioh ia ka jingjop lyngba ka kol ba la thep da u rangialehkai uba dei u substiture u Wanlamsuk Nongkhlaw hashwa ban kut noh  ka jingialehkai.

Mynta ka Rangdajied ka la don ha ka kyrdan kaba nyngkong, kata hadien ba ka la ioh ban khur pura ia ki 15 point lyngba ki santylli ki jingialehkai ha kane ka samoi bad thikna ban ioh rung sha ka semifinal. Katba na ka bynta ka Nangkiew Irat kane ka dei ka sien shah rem kaba sawsien kynthih bad iai neh ha ka kyrdan kaba hynniew.

Lashai ka sngi 23 tarik yn ioh ban sakhi ia ka jingialehkai kaba itynnad hapdeng ka kynhun lahduh jong ka samoi kaba la dep ka Mawlai SC pyrshah ia ka Shillong Lajong FC ha ka por 3:15 janmiet.