Rung semifinal ka Demthring, Nangbah Iawmusiang, Wahiajer bad Dulong haka First Div ka WJDSA

Syllad | The Rising MeghalayaNovember 4, 2023

Ka Demthring, Nangbah Iawmusiang, Wahiajer bad ka Dulong kila rung sha ka kyrdan jong ka semifinal haka First Division Football Tournament kaba pyniaid da ka West Jaintia District Sports Association (WJDSA).

Katba ka Shangpung Moosyiem bad ka Lutituber hadien ka jingbym lah ialehkai bha mynta ka aiom ialehkai kila hap noh ban hiar sha ka kyrdan Second Division ka WJDSA

Haba phai sha ka jingialehkai kaba khatduh, haka sngi Saitjain kaba la long ha Kiang Nangbah Stadium, ka Dulong kala jop 2-0 iaka Moosalyngkat bad ka Wahiajer kala pynliem da 1-0 iaka Khliehiongriang.

Ka kol ka Wahiajer kala wan lyngba u Geoge Ryngkhlem haka minit kaba 4’ bad kane ka kol kala neh haduh bala wai ka por iakhun.

Ka kol ka Dulong kala wan lyngba u Wansa Laloo 59’ bad u Sahame Sumer 69’.

Ka Wahiajer da kane ka namjop kala wan haka kyrdan kaba hakhlieh haka miej iakhein poin na ka Pool B da kaba kamai 15 na ki san tylli ki jingiakhun, bud sa ka Dulong kaba kamai 12 poin na ki san sien iakhun.

Na ka Pool A ka Demthring kala wan haka kyrdan kaba hakhlieh duh haka miej iakhein poin da kaba kamai 10 poin bad tam shikol lyngba ka jinghiapher kol iaka Nangbah Iawmusiang kaba wan ba ar.