Rung quarterfinal sa ka Tuber Kmaishnong bad ka Wapung Shnong haka 3rd Div ka EJHDFA

Syllad | The Rising MeghalayaOctober 5, 2024

Ka Tuber Kmaishong CSC bad ka Wapung Shnong SC ki long sa ar tylli ki kynhun kiba rung sha ka kyrdan quarterfinal haka 3rd Division Football Tournament ka East Jaintia Hills District Football Association (EJHDFA).

Kane kala wan long hadien ba ka Tuber Kmaishnong bad k Wapung Shnong kila jop haka jingialehkai round-16 kaba long ha madan artificial turf Diengshynrum haka 5 tarik Risaw. Baroh ar tylli kine ki kynhun la rai iaka namjop jong ki da ka tie breaker.

Haba phai sha ka jingialehkai, ka Tuber Kmaishnong kala jop iaka Nongthymme SC da 4-3 hadien ba ka jingiakhun katkum ka por bala buh kala wai da 1-1. Ha kane ka jingialehkai ka Nongthymme kala thep shuwa iaka kol lyngba u Ebormi Sympli (36) bad ka Tuber Kmaishnong ka wan nadien ban tan iaka jingialehkai sha kaba iakhaid lyngba ka kol u Samewaki Ryngkhlem (74).

Haka jingialehkai kaba bud, ka Wapung Shnong kala jop iaka Evergreen Ladwahwapung da 3-1 haka tie breaker. Haka jingiakhun kine ki ar liang mamla kila iakhaid da 1-1. Na kaliang ka Wapung Shnong la thep iaka kol jong ka da u Damang Ryngkhlem (17) bad na ka Evergreen la thep da u Satisfy Lamo (47).