Rung ka Sohkha Govt. & ka North Liberty HSS haka First Twenty ka resol SSLC na WJH

Syllad | The Rising MeghalayaJuly 20, 2020

Ka Sohkha Govt. Higher Secondary School, School bad ka North Liberty Higher Secondary School, Jowai ki dei ki ar tylli ki skul na West Jaintia HIlls District kiba la ioh ban rung haka kyrdan First Twenty haka SSLC examination kaba la pynbna da ka MBoSE haka sngi Nyngkong

Ka Sohkha Govt. Higher Secondary School kala rung ha kyrdan First Twenty hadien ba u Lakhon Larry Brown Khonglah ula wan haka kyrdan kaba 9 bad ioh 548 marks. Ha kane ka kyrdan la rung ruh da u khynnah ka skul RK Mission HSS, Cherrapunji hadien ba u Kushal Bagchi ula ioh ka juh ka mark (548).

Katba ka Natasha B. Blah kala wan haka kyrdan kaba 14 da kaba ioh 541 marks bad u Snienbha Suchiang ula wan haka kyrdan kaba 18 hadien ba ula ioh 537 marks. Baroh ar ngut kine ki khynnah ki dei na ka skul North Liberty Higher Secondary School, Jowai.

Baroh kine ki khynnah haba kren bad ki nongthoh khubor kila pynpaw ba lada plie ka lad ki kwah ban pule haka lain doktor.

Kila pynpaw ka jingsngewnguh iaki kmie ki kpa bad ki nonghikai kiba la iarap iaki haka jingim pule puthi kaba manla ka sngi kaba la iarap iaki ba kin poi sha kane ka thong.

U Principal ka North Liberty HSS B Richard Uriah ula pynpaw iaka jingkmen ba ki khynnah ka skul jong u kila leh bha ha kane ka eksam. Ula ai khublei kyrpang iaka Natasha B Blah bad u Snienbha Suchiang kiba la ioh ia ka kyrdan First Twenty kaba la wanrah ka nam ka burom ym tang iaka skul, hynrei iaka iing ka sem jong ki bad ka district baroh kawei.

Haba kylli iaka online klas, “Ngi la long kiba pynkhreh ban sam iaka jingnang jingstad sha ki khynnah daka online. Ngi la pynkhreh ban pynbiang bha ka rukom hikai kaba janai iaki khynnah klas 9, 10 kumjuh ki 11 bad 12.

Nga kyntu ia ka sorkar ban phai khmat sha ki khynnah kiba wan na ka longiing ba duk ba suk ban pynbiang iaki jingdonkam jong ki kum ki phone bad tablet kiba ki kmie ki kpa jong ki kim ioh lad ban thied bad ban peit ruh ba ka internet kan biang ha manla la ki jaka khnang ba ka jingsam jingnang jingstad sha ki khynnah kan nym shah ktah lyngba ka online klass,” ong u Babu Richard.

Haba phai sha baroh kawei ka jylla ka Chetna Bose na Sherwood School, Tura kala wan nyngkong mynta u snem hadien ba kala ioh 568 marks.

Sainava Modak na St. Thomas Higher Secondary School, Shillong ula wan ba ar hadien ba la ioh 565 marks bad ka Ainamdaphisha P Byrsat na Little Flower School, Shillong kala wan ba lai da kaba ioh 561 marks.

Ki don haduh 50081 kiba iakhun iaka eksam matrik mynta u snem bad 25195 ngut kila pass na ki 143 centres ha rilum Khasi, Jaintia bad Garo.

West Jaintia Hills District kala wan nyngkong haka pass percentage da kaba ioh 69.96 per cent bud sa East Jaintia Hills 69.00 per cent bad ka South Garo Hills kaba duna eh 26.57 percent.