Rung ka Mookyndur sha ka final haka 2nd Div ka WJDSA

Syllad | The Rising MeghalayaAugust 9, 2022

Ka Mookyndur kala rung sha ka final jong ka 2nd Division Football Tournement- ka 5th Debo Shullai Memorial Trophy kaba pyniaid ka WJDSA. Kane kala wan hadien ba kala pynliem da 3-1 iaka West Madan Mustem haka jingiakhun kaba long ha Kiang Nangbah Stadium haka sngi ba ar.

U Jomsing Pariat ula kylla long u namtam ha kane ka jingiakhun hadien ba la lah ban lam lynti iaka Mookyndur ban ioh khur iaka namjop. Marwei ula thep ar kol (18, 78), shikol la thep da u Promi Suting (46).

Shikol ka West Madan Mustem la thep da u Ninecyfull Shylla (74).

Da kane ka namjop ka Mookyndur kan kreh pat ban aireng iaka Khliehiongriang ban iaknieh iaka nam lahduh ha ka 2nd Division mynta ka aiom, kaba iaka tarik iakhun ka WJDSA kan pynbna hadien.

Ka Khliehiongriang bad ka Mookyndur haka aiom ialehkai kaban wan kin ialehkai haka 1st Division, katba ka Lumpyrtuh Mihmyntdu bad ka Mynsngad kila hap ban hiar sha ka kyrdan Third Division hadien ba kim shym la lah ban ialehkai bha mynta ka aiom ialehkai.