Rung ka Laitkor SC sha ka phainal ka 2nd Div. Football ka SSA

Syllad | The Rising MeghalayaMarch 2, 2022

Ka Laitkor Sports Club, ka la rung sha ka phainal ka lympung ialehkai Second Division Football, ka Shillong Sports Association.

Ha ka jingiakhun iaka semifinal kaba ar, ba la long ha madan ka MFA Turf, Third Ground, Polo, ka jingrung ka Laitkor sha ka phainal kala wan hadien ba ka la lah bakan pynliem noh ia ka Marbisu SC da 3-2, lyngba ka tie braker.

Ka khana jong kaneka jingiakhun, ka long ba haduh bala kut ka por bala buh, kine ki ar kynhun ki lalah shwa ba kin iakhaid da mar shi kol, ha kaba ka kynhun ba la ioh ban pynkhih nyngkong ia ka jar dei ka Marbisu SC ha ka minit ba 50 ba la thep ia ka da u Anderson Nongdhar.

Ka jingioh ban thep ka Marbisu ia kane ka shi kol, kala pynitynnad bha ia kane ka jingiakhun, ha kaba ka Laitkor SC khlem da tyngkai ia la ka buit bad ka bor ka jong ka, ka la iakhun tyyngeh ban ioh lem ha kaban pynphai ia kane ka shi kol ba ka la shah tam.

Hadien ka jingiai treishitom da baroh ki nongialehikai, ha ka minit ba 90, ka Laitkor SC ka la ioh ia ka kabu ksiar ban pynphai kylla ia kaneka shi kol lyngba u Risuklang Malngiang.

Hadien kane, la rah pat ia ka jingiakohun sha ka extra time, kaba hangne ki ar kynhun kim shym la lah shuh ban ia pynkhih ia ka jar, bad ha kaba kut khnang ban ioh ia ka rai mano napdeng kine kiban jam sha ka phainal, la rah noh pat sha ka tie breaker, ha kaba ka Laitkor ka la jop ia kiane ka jingiakhun hadien ba ka la ioh ba kan thep lai tylli ki kol, katba na ka liang jong ka (3 – 2) Marbisu SC ka la ioh ba kan thep tang 2 kol.

Da kane ka jingjop, ka Laitkor SC kan khreh ba kan mih madan naka bynta ban iakhun pyrshah ia ka Mylliem, kaba hynnin ka sngi ha ka jingiakhun ia ka semifinal kaba nyngkong, kane ka kynhun ka la lah ba kan pynliem noh ia ka Sohiong SC da 2-1.