Reservation Policy: Dawa ki Muster Roll bad Nongbylla sngi ban bhah 5% na ka bynta ki khun jong ki

Syllad | The Rising MeghalayaJuly 16, 2024

Ka All Jaintia Muster Roll Workers & Labour Union (AJMRWLU) ka la kyntu ban bhah kyrpang 5% na ka bynta ki khun ki kti jong ki nongtrei bylla sngi ha ki jaka pule kumjuh ha ka liang ki kam sorkar bad ki kam shimet kumjuh.

Haba aiti ia ka dorkhas sha ka Expert Committee on Reservation Policy, ka president ka AJMRWLU ka Kong Daioowanphi Iakai ka la ong, “Ka dei ka bynta kaba la tip bha ba ki khun jong ki nongtrei bylla sngi (muster roll) kiba don ha ki tnad sorkar bapher bapher lane kiwei pat ki longiing kiba duk kiba trei ha ki kam shna iing bad jingtei, bylla ha ki iingbriew bad ki nongrep ki iakynduh jingeh shibun na ka bynta ban ioh lad ha ka liang ki jingpule kiba kham shalor ne ban iohlad ha ki kam sorkar hapoh ka jylla. Kiba bun na kine ki dei kiba duna shibun ha ka liang ka ioh ka kot ban kyrshan ia la ki jong ki khun ha ki jingpule bad ha ki jingangnud ki jong ki.”

“Halor kane ka bynta, ngi na ka liang ka AJMRWLU ngi kyrpad jur ban ai ia ka bhah kaba 5% na ka bynta ki khun ki kti jong ki nongtrei bylla sngi ha ki jingpule bad ha ka liang ka iohkam sorkar ne ki kam jong ki riew shimet ha ki bynta bapher bapher ka Jylla Meghalaya. Kane ka jingthmu ka long ban weng ia ki jingeh hapdeng ki khynnah pule bad ki samla jong ngi da kaba pynioh pat ha ki ia ki lad ha ka liang ka jingbhah ha ka pule puthi bad ha ka liang ka ioh kam ioh jam,” ka la ong.

Nalor kata ka President ka la pynpaw ruh ba kaba kum kane ka jingbhah kyrpang ym tang ba kan kyntiew halor ka jingpynioh ia ki hok hynrei ka iarap ruh ban kyntiew bad noh synniang ia ka roi ka par jong ka jylla da kaba pynkupbor ia kiba duna ha ka liang ka ioh ka kot bad ban kyntiew ia ka roi ka par ha baroh ki liang, kata ka ban long ruh ha ka nongrim jong ka jingbym shah liang bad ka jingkhuid jingsuba, kata ka ban pynthikna ruh ba man ki khynnah kiba stad kin ioh ia ka lad ban bteng ia ki jingpule ha ki kyrdan kiba shalor bad ia ki thong kiba ki angnud.

“Kumta ngi kyntu ia ki dkhot ka Expert Committee ba kin pdiang ia kane ka jingkyrpad bad ban shim ia ki sienjam kiba donkam da kaba pynrung lang ia kane ka jingbhah kyrpang ha ka jingpynbeit thymmai ia ka Meghalaya State Reservation Policy,” ong ka presidet ka Seng ha ka dorkhas da kaba bynrap “ba da kaba leh kumne, ngi lah ban iatreilang na ka bynta ban thaw ia ka imlang sahlang kaba iaid shaphrang ha kaba baroh kito kiba wan na ki longiing kiba duna ha ka ioh ka kot kin ioh lem ia ka lad ban pynurlong ia ka lad ban roi na ka bynta ka jinglong briew kaba pura.”