Rakhe World Mental Health Day ha Jowai

Syllad | The Rising MeghalayaOctober 10, 2022

Ka ophis jong ka District Medical & Health Officer, West Jaintia Hills District kala rakhe iaka World Mental Health Day ha iing dorbar jong ka shnong Mynthong haka sngi Nyngkong.

Ka World Mental Health Day ka dei ka sngi kaba la rakhe ha satlak ka pyrthei manla ka 10 tarik u bnai Risaw ban ban iathir jingmut bad ban hikai kumno ban lait na ka jingpang shitom jingmut jingpyrkhat.

La pynlong ia kane ka prokram da ka District Mental Health Programme bad ka matpdeng ka long “Make Mental Health & Well Being For All A Global Priority”.

Ka Dr. AN Pasweth, Psychiatrist (Nodal Officer, DMHP) haba kren kala iathuh ba ka jingpang shitom jingmut jingpyrkhat ka shim iaka jingim briew. Ki dak ki shin jong ki briew kiba shitom haka jingmut jingpyrkhat bunsien kim ia khleh lang bad ki briew ki kiar ne shong marwei bad bunsien ki pyrkhat bad ianujor ia kiwei.

Ha ka pyrthei manla ka 40 second uwei u briew u iap da kaba bthah jubor iaka jingim tang namar ka jingshitom ka bor pyrkhat, la ong ka Dr Pasweth bad kala kyntu ruh iaki khynnah skul haba ki iohi ia kino kino kiba don iaki dak ki shin ba shitom jingmut jingpyrkhat iarap iaki ban iasyllok iaki doktor bad lyngba ka prokram kin ioh ruh iaka jingsyllok bad dawai sahin kaba ym donkam ban siew eiei.

Kiwei kiwei ki jingpang kiba wanrah iaka jingshitom jingmut jingpyrkhat ka dei ka jingkyrni haka jingdih iaki kynja dih buaid. Kane ruh ka dei ka jingshitom kaba don kam ban ioh jingsumar ban lait na ki jingmyllein ba sniew.

Ka kong Shelomi Syngkon, Clinical Psychologist kaba la kren kyllum halor kane ka jingpang da ka ai nuska bon kam ban kylli, sngap bad iarap iaki briew ba don ia kine ki dak jingshitom haka bor pyrkhat.

Kiwei kiwei kiba kren ki kynthup iaka iaka Kong Diana Roy Tongper, Psychiatric Social Worker bad u Dr E. Dann, Medical & Health Officer uba pyniaid iaka jingialang.

Ki skul kiba wan iashimbynta ha kane ka prokram ki kynthup Govt Boys’ HSS bad Govt Girls’ HSS, St. Mary Mazzarello Girls’ HSS, QC Springside HSS bad ka Thomas Jones Synod College ha ryngkat bad ki nonghikai.