Rakhe World Hepatitis Week ha Ladrymbai, yn ai tika haka 30 tarik Naitung ha Khliehriat

Syllad | The Rising MeghalayaJuly 29, 2024

Haba bteng ïa ka jingrakhe ïa ka World Hepatitis Week 2024, ka ophis District Medical & Health Officer, East Jaiñtia Hills District haka 26 tarik kala rakhe ïa kane ka sngi ha Ladrymbai, Dongwah (Rymbai Road), East Jaiñtia Hills District.

Ha kane ka prokram ha Ladrymbai (Dongwah) la wan ban iashim bynta da i District Immunization Officer, East Jaintia Hills District, Dr NP Suchiang, Medical Officer in-charge of Opioid Substitution Therapy (OST) Centre, Khliehriat, Dr. J Nongtdu bad kiwei.

Haba ai jingkren ha kane ka jingialang, I District Immunization Officer ka East Jaintia Hills District, Dr NP Suchiang ila ong ba ia kane ka prokram la pynlong ban pynsngewthuh ia ki briew halor ka jingsniew jong u khniang jingpang hepatitis ia ka met u briew bad ki lad ki lynti kiba ki briew ki lah ban leh ban iada na ka ka jingsaphriang jong u khniang jingpang khamtam eh, ka jingpang Hepatitis B&C.

I Dr Suchiang i la kdew ruh halor ka jaka sumar ia ka jingpang Hepatitis ba la pynbiang ha ka District bad ila pynshai halor ka rukom sumar kiba iadei bad ka jingpang Hepatitis B&C.

Katba u Medical Officer ba peit ia ka Opioid Substitution Therapy (OST) Centre, u Khliehriat Dr. J. Nongtdu ha ka jingkren ila iathuh bniah kumno ka jingpang hepatitis ka rung ha ka met u briew bad  ka jingktah jong ka virus ha ka met khamtam eh ia u dohnud u briew.

I la batai bniah ruh halor ki jait jingpang Hepatitis bapher bapher, ki dak ki shin bad kumjuh ruh ki kyrdan bapher bapher jong kane ka jingpang kiba ktah iaka dur khmat, ka jingpher ka sniehdoh, ka jingbym lah bam, ka jingpang ki mat, ka jingkylla iong ka um pynjhieh, ka jingtlot haka bor met bad kiwei kiwei.

I la kyntu ban phriang ia ka khubor sha kylleng halor ka jingpang Hepatitis sha ki bahaiing hasem jong ki bad sha ki nongshong shnong ban iada na ka jingpang. Ha kane ka prokram la pyntip ba ka tnad ka koit ka khiah ba yn sa ai tika na ka bynta ban ïada na ka jingpang Hepatitis ha Opioid Substitution Therapy (OST) Centre, Khliehriat ha ka 30 tarik Naitung, 2024.