Rakhe Teachers’ Day ka jylla Meghalaya; ioh pdiang 13 ngut ki nonghikai ia ka State Award

Syllad | The Rising MeghalayaSeptember 5, 2023

Ka jylla Meghalaya bad ka ri India hi baroh kawei mynta ka sngi 5 tarik ka la rakhe ia ka sngi kyrpang jong ki nonghikai ne ka ‘Teachers’ Day’ bad ruh ia ka lyngkhuh sngikha u president barim jong ka ri u Dr S. Radhakrishnan ha kaba ki la don haduh 13 ngut ki nonghikai skul kiba la ioh pdiang ia ka khusnam “State Teachers’ Award,” ha ka jingialang ba la pynlong hapoh U Soso Tham Auditorium, Shillong.

Ia kine ki nonghikai la pynkup burom da u Myntri ka Tnat pule puthi u Rakkam A Sangma uba la ia don ryngkat lang ha kane ka sngi kum u Kongsan.

Haba aijingkren ha ka jingialang u Kongsan u la ong ba ka pule puthi ka long uwei na ki paia uba noh synniang sha ka lynti ban tei ia ka ri kaba khraw.Ki nonghikai ki don ia ka bynta kaba kongsan ban pynpoi sha kane ka thong da kaba btin lynti ia ki jabieng kiba dang lung ban long ki briew kiba paw ha ka imlang ka sahlang bad ki ban poi sha ka thong jong ka jingjop.

Da kaba pdiang halor kiba bun ki jingeh kiba kum ki nonghikai ki hap ban mad, kata kum ha kaba iadei bad ka jingbym iaryngkat ha ka jingioh tulop, na ka liang u Myntri u la pynpaw halor ka jingkut jingmut jong ka sorkar ban shimkhia halor kane ka mat. Ha ka juh ka por u la ban ruh halor ka jingdonkam ia ki nonghikai ba kin wan shakhmat ha ryngkat ki lad bapher bapher na ka bynta ban kyntiew ia ka pule puthi hapdeng ki khynnah skul.

Nalor kata u Myntri u la ai khublei ruh ia u Madhav Singh uba dei u Senior Science Teacher jong ka Alpha English Higher Secondary School, Nongpoh halor ka jingioh pdiang ia ka khusnam ‘National Teacher Award 2023.’

Shibynta jong kane ka jingrakhe une u Myntri u la plie ruh ia kiba bun tylli ki projek ba kyrpang kiba hap hapoh ka SSA, kumjuh ia ka website jong ka Samagra Shiksha Abhiyan, ka Adopt a School Campaign bad ka PM e-Vidya Meghalaya. 

Ka sorkar Meghalaya ka la pynlong ia kane ka jingpynkup burom ia ki nonghikai ha baroh kawei ka jylla shibynta kum ka jingithuh ia ka jingnoh synniang ka jong ki ha ka ban pynkylla dur ia ka jinglong jingim jong ki khynnah skul.

Kine ki nonghikai kiba la shah pynkup burom ha kane ka jingrakhe mynta ka sngi ki kynthup ia ka  Smti V. Dipali Sharma Rao, Principal, Laban Assamese Girls’ Higher Secondary School,  Belinda Kharsati, Head Teacher, Pomlahier L.P School, Sisingh Ryntong, Asst. Teacher, New Nongstoin ‘B’ Govt. L.P School, Apborsing L. Mawlong, Asst. Teacher, Tirot Sing Memorial Govt. U.P School, Nongkhlaw, Kwirin Diengdoh, Headmaster, Mawsaw Govt. U.P School, Mawkyrwat, Ewanmidaka Mukhim, Asst. Teacher, Govt. Girls’ Higher Secondary School, Jowai,Ribait Oo Pde, Asst. Teacher, Tep Kyndait Govt. U.P School, Tuber Kmaishnong,Golak Chandra Medhi, Asst. Lecturer, Jirang Govt. Higher Secondary School, New Jirang, Babansing Ch. Sangma, Head Teacher, Rongreng Baiza Govt. L.P School, Wilton Marak, Headmaster, Daram Govt. U.P School, Frederick R. Sangma, Headmaster, Dobasipara U.P School, Manoj Kumar Prasad, Asst. Teacher, Montfort Centre for Education(Sec), Mirabella G. Sangma, Head Teacher-Cum Secretary, Chengkompara Nokat Govt. L.P School, Nozmul Arefin, Vice Principal, Baghmara Govt. Higher Secondary School.