Rakhe Mother’s Day ka NPP Jowai, pynkup burom iaki 100 ngut ki longkmie

Syllad | The Rising MeghalayaMay 12, 2025

Ka National People’s Party, (NPP) Jowai Block kala snohktilang bad ki ri satlak ka pyrthei kala rakhe iaka Mother’s Day ne ka sngi burom iaki kmie halor ka jingnoh synniag jong ki hapoh la ki iing ki sem bad ka imlang ka sahlang.

Iaka jingrakhe la pynlong halor ka phang ‘La pynkup iaka da ka bor bad burom bad ka rkhie sahuh iaka por ban dang wan’ Ka Kitab ki Phawar 31:25.

U MLA ka Jowai bad State Working President NPYF Ma Wailadkiki Shylla kum u kongsan, u District President NPP Ma Ocotomewot Lamin, ki MDC ka NPP ba kynthup u Krison Langstang bad Reforming Son Lamare haka jingialang kaba la long ha Lion Mission Compound Dorbar Hall haka 10 tarik Jymmang.

Kum ka dak ka ka jingburom ia u synniang jong ki shaka imlang sahlang bad ka shnong ka thaw, ka NPP Block Jowai kala pynkup burom haduh 100 ngut ki longkmie.

U Ma Wailadmiki Shylla haka jingkren, ula ong, ka jingrakhe jong ka NPP iaka Mother’s Day, ymdei ba ka pynkiew iaka party hynrei ka leh naduh ka mynsiem ban ai burom iaki longkmie kiba la leh shibun ki kam ba bha hapoh ki iing ki sem bad ka imlang sahlang.

Ka Kmie kadei ka nongri nongsumar iaka iing ka sem bad na ka kmie la ioh shibun ki jinghikai ba kordor, la ong u MLA bad bynrap ba ki jingai jingmut jong ka kmie ki long kiba myntoi na ka bynta ki khun ki kti haki liang baroh, ki kam trei kam ktah bad bun kiwei kiwei ki ban kyntiew iaka longbriew manbriew.

Hakum kane ka sngi kyrpang jong ki kmie, u Ma Wailadmiki Shylla ula pynpaw ka jingsngewsih namar ka Meghalaya kadei jylla napdeng ki jylla hapoh ka ri kaba bun tam ki longkmie ba armet ba iap ha ka por ba kha khunlung bad ula kyntu iaki longkmie ban ia sneng iakraw para longkmie ban leit shaki jaka sumar katba dang biang ka por khnang ban lait na kino kino ki jingjia kiba sngewsih.

Shwa kane la ioh ka jingduwai na ka Kong Stately Suting District Vice President NPP WJHD, ka jingkren kyrpang na ka Kong Tngenris Sutnga Ex president Train Nurses Association of India bad ka jingkren khublei na ka Kong Shida Sukhlain Secreatary NPP Women’s Front Jowai Block haka jingialang kaba la pyniaid da ka Kong EN Lamare.

La pynphuh pynphieng iaka jingrakhe da ki jingrwai jingshad ba la shim bynta da ka  Sohmynting Combined Unit, Ialong Combined Unit bad na Mukhla nalor kiwei kiwei.