Rakhe Meghalaya Day ha West Jaiñtia Hills da kaba sdang ïaka online register ia kiba ia thoh shongkurim

Syllad | The Rising MeghalayaJanuary 21, 2020

JOWAI: Ka West Jaiñtia Hills District kala rakhe ïaka jingïoh jylla ba pura “48th Meghalaya Day” da kaba sdang ïaka online service ban register ia kiba ia thoh shongkurim hapoh ka kyndon aiñ Special Marriage Act 1954. Nalor ka register iaka iathoh shongkurim ki paidbah ban ïoh jingbit na ka bynta ban pynlong kino kino ki jingïalang paidbah, tamasa naduh mynta ka sngi ki hap ban leh online.

Ïa kane ka online service la plie paidbah da u Chief Executive Member (CEM), Jaiñtia Hills Autonomous District Council (JHADC) u MA Thombor Shiwat uba long kum u kongsan haka jingïadonlang u Octomewot Lamin, Nominated MDC kum u symbud kongsan haka jingialang kaba long ha District Library Auditorium, Mynthong, Jowai haka sngi ba Ar.

Ha kane ka jingrakhe ïaka Meghalaya Day la ïdonlang ruh u Garod LSN Dykes,IAS,  Deputy Commissioner, West Jaintia Hills, Lakador Syiem, MPS, Superintendent of Police west Jaiñtia Hills , Kong RS Manners, MCS, Additional Deputy Commissioner, Kong DD Syngai , Kong B Blah, Extra Assistant Commissioners, Jowai bad kiwei kiwei.

U Ma Thombor haba kren ula pynkynmaw ïaki nongïaleh kiba ban pynïoh jylla ba pura ïaka jylla bad ula ong ruh ba ym dei ban hun ba la ïoh jylla ba pura, hynrei ban long ki nongshong shnong kiba don ka jingkitkhlieh bad ban ïatreilang bad ka sorkar ban kyntiew ïaka pule ka puthi, koit ka khiah bad ban wanrah ïaka roi ka par ka jylla.

U ma Thombor ula sam ruh ïaka khusnam syrnod bad pisa ka SMART Trust, sha u Daoo Teiki Maya Garod na North Liberty School. Jowai, Pdiangmon Niang, Lummuroo Secondary, Shangpung, Eddie Savio Rymbai, Marian Higher Secondary school.

U Deputy Commissioner Garod LSN Dykes haba kren pdiang ula ïathuh ïaka jingjop ka sorkar jylla ha kaban wanrah iaka roi ka par ka jylla.

Ka kong I. Rymbai, District Informatics Officer kala iathuh ba kane ka register iathoh shongkurim bad ki jingpan jingbit ban long ialang paidbah bad tamasa paidbah la ban leh na ki Common Service Centres bad ki Cyber cafe.Ha East Jaiñtia Hills ruh kala snohktilang bad ka jylla baroh kawei ban rakhe ïaka Meghalaya Day ha Office of the Deputy Commissioner, East Jaiñtia hills District. U Kyrmen Shylla, Minister jong ka tnad Social Welfare ula long u kongsan haka jingiadonlang Dy. CEM u Laski Rymbai, u u Ma Finelyness Bareh Chairman JHADC, u DC Bah FM Dopth bad kiwei kiwei.