Rakhe kynmaw burom ka Bethany hospital ia u nongseng jong ka u Dr John L Sailo 

Syllad | The Rising MeghalayaOctober 12, 2023

Ka Bethany Hospital, Shillong haka 10 tarik mynta u bnai ka la rakhe ia ka John L. Sailo Ryntathiang Memorial Oration kaba ar kum ka dak ban kynmaw burom halor ki jingnoh synniang jong une u nongseng jong kane ka  hospital.

Kane ka jingialang ka pynpaw ruh ia ka jingkut jingmut jong ka Bethany Hospital ban bteng pynneh pynsah ia ka thong bad ka jingangnud jong une u nongseng jong ka hospital, u Dr Sailo.

Ia ka jingkren kaba kham bniah mynta u snem la ioh na u Dr. Kethoser Kevichusa, uba dei u nongkren paidbah ba pawkhmat bad ruh u nongthoh kot uba dei ruh u nongioh pdiang ba nyngkong ia ka khusnam Gordon Graham Prize halor ka thoh ka tar kaba iadei bad ki jaidbynriew Naga.

Ha ka jingkren u Dr. Kevichusa u la pynkynmaw ha kaba iadei bad ka nongrim ba skhem jong ka Bethany Hospital, halor ka mynsiem ai jingshakri, ka jingsumar bad ka jingkut jingmut ba skhem jong ka.

U la ban ruh halor ka jingdonkam ba kongsan ia ka jingdon mynsiem ha kaba iadei bad ki lad aijingsumar, kata da kaba pyniapher ban sngewthuh ia jingsngew jong kiwei pat, kata namar ka jingdon mynsiem ka kynthup halor ka jingsngewthuh ym tang ia ka jingpang jingshitom jong kiwei pat, hynrei ka don ruh ia ka jingangnud ban weng ia katei ka jingeh kaba ki iakynduh.

Nalor kata u la kren ruh halor ka histori kaba iadei bad ki hospital kaba sdang na ka jaka ban pynjem ia ki jingpang jingshitom sha ka jaka ban ai ka jingsumar sukher. U Dr. Kevichusa u la pyrto tuh ia ki hospital halor ka jingshim iaki sienjam kiba iadei bad ki lad aijingsumar lyngba ka lynti jong ka jingieit.U la kdew ba katba ka thong jong ki hospital ka long ban pynjem ia ki jingpang jingshitom, hynrei ka rukom sumar sukher ha ka jingiadei bad ki nongpang ruh ka dei ka byna kaba kongsan, kata ka mut yn tang ban pynjem ia ka doh hynrei ka jingai mynsiem ka jingpyntngen bad aijingkyrshan ia ki nongpang

La pynphuh pynphieng shuh shuh ia kane ka sngi da ka jingrwai na u Nise Meruno, uba dei u nonglamktien ba pawkhmat ka Yamaha ia uba la tip bha halor ki sur jingrwai ba myllung jong u. Kane ka dei ruh kaba iahap sur ban leh burom ia u Dr Sailo uba ieit ia ka tem ka put bad ia ki jingrwai.