Rakhe ka Woodland WK Hospital iaka World AIDS Day ha Khliehriat ban pynshlur iaki nongpang ban mih shakhmat

Syllad | The Rising MeghalayaDecember 3, 2022

Ka Woodland WK Hospital, Sabahmuswang kum shibynta ban pynsaphriang iaka khubor ban iakhun pyrshah iaka jingpang AIDS kala rakhe iaka World AIDS Day ha Khliehriat haka sngi Palei.

Ia kane ka prokram la pynlong ha surok ha phyllaw ka Family Mart da ka jingiatreilang bad ka Jaintia Students Movement (JSM) bad ka Jaintia Network for Positive People (JNP+). Ka matpdeng kalong “Putting Ourselves to the test, achieving equity to HIV” ne ban pynshlur iaki paidbah ban phah test ban iakhun pyrshah iaka jingpang HIV da kaba pynduh iaka jingñiewbein ñiewpoh kaba long ki jingkhanglad ban wan shakhmat ki nongpang ban shah sumar.

Ka jingrakhe ia ka World AIDS Day ka long ban hikai bad saphriang iaka khubor jong ka jingieid ban iada iaka jingim na ka daw jong ka jingpang ñiangkulia (AIDS) namar tang da kaba sumar lah ban iada iaka jingsaphriang ka jingpang.

Ia kane ka jingialang rakhe ia kane ka sngi kyrpang la pyniaid da u W Siangshai president JSM Eastern Region bad la ioh iaka jingkren na ka R Siangshai secretary JNP+, Dr. D Paslein (RMO), ka R Suchiang president JNP+ bad ka jingaikhublei da ka Sister Wandaroi Suchiang.

Kala don ruh ka jingialehkai skit kaba la shimbynta da ki staff Nurse ka Woodland WK Hospital.