Rakhe ka Seng Kur Shadap Manar iaka jubili rupa ka kur, angnud ban shna iaka museum
Ka Seng Kur Shadap Manar haka 27 tarik Nohprah kala pynlong iaka dorbar kur bad ha kajuh ka por kala rakhe iaka jubili rupa (Silver Jubilee) haka shnong Barato West Jaintia Hills.
Ia ka jingialang la pyniaid da u president ka seng kur, u ma Herlington Shadap Manar ha ka jingiadonlang u MLA Mowkaiaw u Ma Nujorki Sungoh kum u kongsan, MDC Barato Ma Aiborlang Shadap kum symbod kongsan uba dei ruh u dkhot ka seng Kur.
Ha kane ka sngi la pyllait paitbah ia ka Souvenir Silver Jubilee jong ka kur Shadap Manar da u adviser seng kur u Ma Borin Shadap. U general secretary ka seng kur Ma Goldwin Shadap u la pule lyngkot ia ka history ka seng kur bad u la ai ka memorandum sha u kongsan ia ka jing pan iarap ban shna ia ka museum ka seng kur ha ka shnong Barato kaba dei ka shnong jong ka Syiem Latympang.
U kongsan, symbud kongsan bad u Ma Sunday Manar officer incharge Jowai Police Station kila ai jingkren. Na kaliang u Ma Nujor ula kular ban iarap ia ka seng kur katba lah ban pynurlong ia ka jingthrang ka kur ban shna ia ka museum jong ka seng kur Shadap Manar.
La pynkup burom ia ki nongseng ka jong ka sengkur bad la ot ia ia u cake jubili da ka Kong Rimaya S Manar MCS, Director of DERT jong ka sorkar Meghalaya ba la pynkhreh da ka seng kynthei jong ka seng kur Barato unit.
Kiwei kiwei kiba iadonlang ki dei u Pastor Banker Shadap, Pastor Callme Manar bad kiwei kiwei.
Ha kane ka Durbar kur la pynphuh pynphieng da ka jing shad bad jing rwai na ki Unit kur ba pher ba pher kum naka Iooksi Unit, Mowkaiaw Unit, Jowai Riwar Unit, Shangpung Unit, Barato Unit bad n aka Narwan Unit.
La ioh ruh ban sam ia ki khusnam sha ki khun ka kur Shadap Manar na ka bynta kito kiba pass bha ha ki eksam ba pher ba pher.
Facebook
Instagram
Youtube
Twitter
Leave a Reply