Rakhe ka NEAU Church Khliehtyrshi ia ka Global Youth Day da ka prokram pynkhuid bad workshop

Syllad | The Rising MeghalayaMarch 16, 2025

Ka North East Adventist University (NEAU) Church, Khliehtyrshi ha ka 14 tarik Lber ka la rakhe ia ka  Global Youth Day da kaba pynlong ia ka prokram pynkhuid kaba ju pynlong man la u snem.

Nalor kane ka prokram ba la pynlong ha ryngkat ka jingiatreilang bad ka District Legal Services Authority, West Jaintia Hills bad ka Meghalaya State Pollution Control Board la pynlong ruh ia ka workshop halor ka phang “Various Provisions of Environmental Laws and the Impact of Pollution and Environmental Degradation.”

Shibynta jong kane ka prokram, ki nongiashim bynta ki la ioh ruh ia ki jinghikai halor ki mat kiba iadei bad ka jingpynneh pynsah ia ka mei mariang.

Ia ka workshop halor ki jingpynshai kiba iadei bad ka mariang la pyniaid da u Bah WR Kharkrang, Senior Environmental Engineer, MSPCB. Ha kane ka workshop u la ban jur halor ka jingdonkam ban tehlakam ia ka jingjaboh ha ka mariang, ka rukom pyniaid ia ki jaboh jabain bad ki rukom kiba lah ban pynneh pynsah ban pynthikna ia ka mariang kaba khuid ba suba bad kaba koit ba khiah.  

U nongkren na ka liang ka NEAU u la pynpaw halor ka jingktah kaba bha jong kane ka jingthmu da kaba kdew ba don ki kmie ki kpa kiba la ioh mynsiem na ka jingpyrshang ki la phah ia la ki jong ki khun ban iashim bynta ha ka jingpynkhuid, katba ki nongshong dukan ki la noh synniang da ki byrni na ka bynta ban lum ia ki niut ki nier bad ki jaboh jabain. U la iaroh ruh ia ka jingiashim bynta shitrhem jong ki nongshong shnong.

U Bah FB Passah, Assistant Legal Aid Defence Counsel u la kren shaphang ka jingkylla jong ki ain iada mariang ha India, da kaba pynleit jingmut ia ka Environmental Protection Act of 1986. U la kdew ba katba ka ri India ka don ia ka jingiadei kaba jylliew ha ka kolshor bad ka niam kaba iadei bad ka mariang, ka Riti Synshar Tynrai kaba la shna ha u snem 1950 kam shym la kdew ha kaba iadei bad ki sienjam ban iada ia ka mariang.

U la ong ba dei tad hadien ka jingialang ha Stockholm ha u snem 1972 ba ka India ka la ithuh halor ka jingdonkam kyrkieh ia ka ain kaba iadei bad ka mariang, kaba lam sha ka jingpynkylla ia ka Riti Synshar Ri kaba 42 jong u snem 1976, kaba la wanrah ia ka Article 48A hapoh ka Directive Principles of State Policy (DPSP) bad Article 51A (g) bad kaba la pynkhamti ia ka jingkitkhleih ia ka sorkar kumjuh ia ki nongshong shnong ba kin iada bad pynbha ia ka mariang.

U la pynpaw shuh shuh kumno ba ka jingjia ba sangsot ba la tip kum ka Bhopal Gas Tragedy ha u snem 1984 ka la pynpaw halor ka jingdonkam kyrkieh ban don ia ki kyndon kiba kham pyrkhing ha kaba iadei bad ka mariang bad kaba lam sha ka jingpynjari ia ka ain Environmental Protection Act of 1986. U la ong ba kane ka EAP ka dei ka ain kaba pawnam kaba la buh ia ka nongrim na ka bynta ka jingpyniaid ia ki kam kiba iadei bad ka mariang ha ka juk kaba mynta ha India.

Kiwei pat kiba la ia don lang ha kane ka sngi ki kynthup ia Dr. P Bhaggian, Vice Chancellor of NEAU; Pr. P Shanpliang, Church Pastor of NEAU English Church; P Khyriam, Lecturer AHSS; KRymbai, Rangbah Shnong Khliehtyrshi; F Sari, Para Legal Volunteer bad kiwei kiwei.