Rakhe ka Khasi National Dorbar ia ka jingdap 100 snem

Syllad | The Rising MeghalayaSeptember 5, 2023

U symbud myntri rangbah u Bah Prestone Tynsong u ong ba ka jaitbynriew ka don hapdeng ka jingshngain.  

Haba kren kum u kongsan ha ka jingialang 100 snem jong ka Khasi National Dorbar Hall ha u Nailar 4 tarik, ula ong, “Don ba ong ba ym shngain shuh ka jaitbynriew jong ngi ha ka ri Meghalaya, nga ong ia phi, map lem lada phi iapher jingmut, kam dei kumta. Ngi shngain. Tang kawei ka long- ngin nang pynkhlain shuh.”

U Symbud Myntri Rangbah u kyntu ka dei ban kyndit bynriew ban iaid katkum ba la pynkup bor da ka riti synshar ka Ri India.

La don ruh ka jingpyninam (exhibition), ha katei ka jaka ha kaba la wah ia ki dur kiba rim jong ka Khasi National Dorbar.

Ha ka jingkren lyngkot ha kane ka shlem pyninam, U bah Tynsong u pynpaw ia ka jingsngewtynnad ban phai dien biang ia kiba lah dep bad ia kaei kaei kaba don jingmut.

Shuh u ong “Ka jingdon jong ka exhibition hall kan pynkyrsiew thiah biang ia ngi ki pateng kiba mynta ha kaba ngi iohi ia ka histori kum ba ka long bad kumno ngi iaid lynti ha kane ka khyllipmat kaba mynta.”

Ha kajuh hi ka sngi, U Symbud Myntri Rangbah u la pyllait ia ka kot sah kynmaw Khasi National Dorbar bad pynkup burom ia u general secretary ba rangbah duh u JK Tariang.

“Ki ia iaid lynti haduh ka khyllipmat ba mynta dei lyngba ki jabieng ba nep jong kita ki riew rangbah, dei lyngba ka jing iohi jngai jong ki kaba khatduh, ki ioh ia ka jinglaitluid bad ym tang ka jinglaitluid, ngi ioh ruh ban synshar da lade ia lade,” ong U bah Prestone.

U phai ruh sha ka jingdon jong ka District Council kaba lah seng ha u snem 1953, ha ba u ong ba ka dei ka stieh kaba khraw ia ka jaitbynriew bad ia ka jylla baroh kawei.

“Bad hapoh jong ka bun kiei kiei kiba ngi dang lah ban nang pynbha, nang pynjanai bad ruh ban iaid shakhmat ha ki liang baroh jong ka imlang ka sahlang,” ong u Bah Prestone.