Rakhe ka Jylla ia ka National Sports Day; pynkup burom ia 103 ngut ki nongialehkai da ka song pisa

Syllad | The Rising MeghalayaAugust 30, 2025

Ka Meghalaya ha ka 29 tarik Nailar ka la rakhe ia ka National Sports Day da kaba pynkup burom ia ki 136 ngut ki nongialehkai bad 22 ngut ki coach kiba la iashim bynta ha ka 6th Meghalaya Games, da kaba sam ruh ia ki cheque lyngba ka YESS Meghalaya kaba kot T.45 lak sha ki 103 ngut ki nongialehkai.

Ia kane ka jingrakhe ba pynlong da ka tnad Sports & Youth Affairs ka sorkar Jylla ha Shillong bad Tura kaba pyni ia ka jingangnud jong ka sorkar ban pynroi ia ki sap ki phong bad pynkhlain ha kaba iadei bad ki jingtei ia ki jaka ialehkai ha kylleng ka jylla.

Ia ka YESS Meghalaya la sdang ha u snem 2022 lyngba ka sienjam ba la shim da u Myntri Rangbah ka Jylla u Conrad K Sangma kum shibynta ban ai ka jingkyrshan pisa sha ki Seng Samla, ki Society bad ki Seng trei mon sngewbha ha kylleng ka jylla.

La pynwandur ia kane ka prokram ban pynkupbor ia ki samla da ki jingpynsngewthuh paidbah, ki jingai jinghikai bad ki kam bapher bapher ki ban pynkhlain ia ka jingiashim bynta ha ka imlang sahlang bad ka jinglong nongialam hapdeng ki samla.

Ha ka jingkren u Myntri ka tnad Sports u Bah Shakliar Warjri u la pynpaw ia ka jingkongsan jong ka National Sports Day kum ka jingpynkynmaw ia ka jingkut jingmut jong ka jylla ha ka liang ka koit ka khiah, ka jingiadon bynta lang bad ka jingpynkupbor ia ki samla lyngba ki kam ialehkai sports.

U la ong, “Naduh u snem 2018 ka Tnad Sports & Youth Affairs ka la nangkiew sted, bad wat hapdeng ki jingeh ka sorkar ka la sakhi ia ki jingjop kiba khraw.Ka jingthmu ka jong ngi ka long ban lah ban pynmih ia ki nongialehkai na ka jylla ban leit ia aireng ha ka Olympic Games ka ban wan.”

U Myntri u la ong ruh ba ka jingseisoh ha kaba pynlong ia ka Meghalaya Games ka pynshisha ia ka kolshor jong ka jylla ha ka liang ka jingroi ha ka sport. U la kdew ruh ba ka sorkar ka la wanrah ia ki jingkylla kiba kongsan lyngba ki jingtei kiba bha, ka jingai jinghikai kaba tbit, bad ka jingkyrshan kaba pynshlur bad kaba pynrung ruh ia ka mynsiem jong ka jingaiti bad ka jinglong ryntih kaba kdew ia ka jinglong jong ki nongialehkai kiba shisha, da kaba kyntu ruh ia ki samla ban shim ia kawei pa kawei ka kabu.

Nalor kata u la pynbna ruh ban sdang ia ka Megha Fit Phase 1 da ka jingbei tyngka kaba nyngkong kaba long T.20 lak, da kaba ban jur ia ka jingdonkam ban tei ia ka Meghalaya kaba koit ba khiah bad kaba kiew shakhmat.

U Myntri u la pynpaw ruh ba ka jylla shen kan seng ia ki sports hostel ban pynroi ia ki sap ki phong da ka jingmang kaba T.100 klur ia kaba la dep mynjur na ka bynta kane ka jingthmu. “Ka pisa ba la pynlut kam dei tang ka jingpynlut hynrei ka jingbei tyngka namar ngi ngeit ba kane kan pynkupbor ia ki sports association bad na ka bynta baroh ki samla,” ong u Bah Shakliar.

Katba ha Tura ia kane ka jingrakhe la wan sakhi lang da u Nipon Hajong, MCS, Additional Deputy Commissioner, West Garo Hills uba la ban jur ia ka bor jong ka jingpynkylla jong ka sport ha ka ban kyntiew ia ka jingiatylli bad ia ka bha ka miat.