Rakhe ka CBC Shillong bad USTM ia ka ‘Azadi Ka Amrit Mahotsav’

Syllad | The Rising MeghalayaAugust 11, 2023

Ka Central Bureau of Communication (CBC), hapoh ka tnat Information and Broadcasting jong ka Sorkar India, Regional Office, Shillong ha ka jingiatreilang bad ka University of Science and Technology Meghalaya haka sngi Palei, ka la pynlong ia ka jingpyni ia ki dur ne ka ‘photo exhibition’ kaba ar sngi ha ryngkat kiwei kiwei ki prokram ban rakhe ia ka Azadi Ka Amrit Mahotsav ha USTM.

Ha ka prokram la wan iashim bynta u A Srinivas, DIG (Operations), CRPF, NE Zone, u Samudra Gupta Kashyap, nongthoh kot, nongthoh khubor bad Information Commissioner, Assam barim, u Mahbubul Hoque, Chancellor ka USTM, Dr BK Das, Pro VC ka USTM, Dr RK Sharma, Nongai jingmut ia ka USTM, Gopajit Das, Head of Office, CBC Shillong ha ryngkat kiwei kiwei.

La pynlong ia ka prokram pyni deiriti bad ki jingrwai ieit ri da ki barikor jong ka Song and Drama Division hapoh ka tnat Information and Broadcasting jong ka Sorkar India. Ki delegate ki la plie ruh ia ka jingpyni ia ki dur halor ka “Azadi ka Amrit Mahotsav” kaba ar sngi ha Mother Teresa Park ha phyllaw jong ka USTM.

Ha ka jingai jingkren ban pdiang ia ki nongiashim bynta, u Mahbubul Hoque u la ong ba ka Mahotsav ka dei ka dak jong ka jinglaitluid, ka jingiaid shaphrang bad ka jingiatylli kaba iohi ha kylleng ka ri. Ka USTM ka sngew iahap jingmut bad kine ki jingngeit da kaba pynkupbor ia ki samla pule ba kin long ki nongialam, ki nongsaindur thymmai bad ki nongshong shnong kiba don jingbahkhlieh kiba don bynta ha ka roi ka par jong ka ri, u la ong.

U Samudra Gupta Kashyapu la ong ba kane ka jingpyni ia ki dur halor ka Azadi Ka AmritMahotsavda ka CBC ka plie lad ia ki briew ba kin iohi ia ki jinglong jingman ha ka por jong ka jingiakhih na ka bynta ka jinglaitluid jong ka India bad ba kin sngewthuh ia kito ki por. U la kynmaw ia ki riewshlur ka Meghalaya – U Tirot Sing Syiem, U Kiang Nangbah bad u Pa Togan Sangma, ha kaba u la ong ba bun na ki kot historikim kren shaphang ka histori, ka deiriti jong ka thain shateilammihngi. U la ong ba ka long kaba donkam ban pynkylla ia kane lyngba ka jingiashim bynta ki briew jong ka thain bad ka jingai jingtip ia ka ri shaphang ki kam jong ki nongiakhih, ki riewshemphang, ki nongsaindur bad ki nongialehkai na ka thain na ka bynta ka jingtei ia ka India kaba thymmai.

U A Srinivasu la ong ba ka Amrit Mahotsavka dei ka jingrakhe ia ka jingjop jong ka India ha ki 75 snem. U la kyntu ia kito kiba la wan iashim bynta ba kin trei na ka bynta ki jingthmu jong ki nongiakhih na ka bynta ka jinglaitluid jong ka ri bad ban bud ia ki jingngeit jong ka jingiakhih na ka bynta ka jinglaitluid ka India.

Nalor kata u la pynshlur ruh ia ki samla jong kane ka jaka pule ba kin leit rung ha ki kam iada ri bad ai jingshakri ia ka India.Kane ka jingpynidur ka pyni ia ka jingiakhih na ka bynta ka jinglaitluid ka India da kaba peit bniah ia ki riewshlur na ka thain shateilamihngi ki bym shym la paw pyrthei. La pynkhreh ia ki jingiakop bapher bapher kum shi bynta jong kane ka prokram ha kine ki ar sngi ban wan kiba kynthup ia ka Quiz, Jingsaindur, Jingiatainia bad kiwei kiwei hapdeng ki samla pule. Kane ka jingpynidur ka plie haduh ka 11 tarik u Nailar, 2023 ha kaba ki briew ki lah ban leit peit ia kane.