Rakhe jubili rupa ka seng kur Rymbai Pamrapaithlu

Syllad | The Rising MeghalayaApril 12, 2025

Ka seng kur Rymbai Pamrapaithlu kala plie paidbah iaka jingrakhe jubili rupa ne ka jingdap 25 snem kynthih ka jingiaid lynti ka seng kur ha Pamrapaithlu haka 12 tarik Iaiong.

U Deputy CEM JHADC u Bah Lasky Rymbai kum u kongsan ula pynher iaka lama jubili bad pyllait iaka sur jingrwai.

Haba kren ula ai ka jingiaroh ia ka kur Rymbai Pamrapaithlu ba kala kynjoh sha ka 25 snem ka jingiaid lynti. Ula kyntu iaka Kur Rymbai ban long ki nuksa ban ia kit ia bah iaka eh ka shon hapoh shnong poh thaw bad haka imlang sahlang.

Ula banjur iaki kynthei ban ri burom iaka iing ka sem bad ban burom ia u kurim ban lait ka iing ka sem ban jot ban pra.

Kiwei kiwei kiba kren ki kynthup ia u Damewanhi L Rymbai president sengkur Rymbai Pyllun, Leningstar Rymbai uba pynsngew iaka history ka kur Rymbai Pamrapaithlu bad kiwei kiwei. Ia ka jingialang la pyniaid da u President ka ne ka unit U Romius Rymbai.

La wan ban iashimbynta ha kane ka jingrakhe naduh ki heprit, ki samla, ki longkmie longkpa bad ki kni ki ma ki woh.