Rakhe International Labour Day ha Jowai

Syllad | The Rising MeghalayaMay 2, 2025

Ka District Legal Services Authority (DLSA), West Jaintia Hills ryngkat ka jingiatreilang ka District Labour Office, Jowai kala rakhe iaka International Labour Day haka 1 tarik Jymmang 2025 ha Greta Solutions Training Centre, Loomsooiung Newhill.

Ka Secretary DLSA Kong B Majaw kala iathuh ba ia kane ka sngi la rakhe ha kylleng satlak ka pyrthei ban pynsngewthuh iaka hok ki nongtrei bylla bad ban iada iaki na ka jingshah ban bein. Kala kdew ruh iaka jingkongsan ka kam jong ki nongtrei bylla ha kiba ba bun jait ki kam kaba pyntyllun iaki kam ban iaid beit iaid ryntih haka jingim manla ka sngi.

Ka Labour Inspector Kong B.Toi kala batai haba kaba iadei bad ki aiñ jong ka Sorkar lyngba ka tnad Labour kynthup iaka Minimum Wages Act, Payment of Wages Act, Maternity Benefit Act, Employee Compensation Act, Payment of Bonus Act bad kiwei kiwei ki ain kiba iada iaki nongtrei bylla naka jingshah iuhroit ka hok jong ki na ki nongai kam.

U R Lyngdoh Legal Counsel DLSA ula batai  ba ki nongbylla ki ba shem jingeh haka ba iadei bad ki ain ki kanun ki lah ban wad jingiarap na ka office jong ka DLSA ka ban iarap ban pynioh iaka hok jong ki. Ula kren ruh shaphang ka scheme PMSYM kaba dei ka scheme pension naka bynta ki nongtrei bylla.

Iaka jingialang la pyniaid da u S Shylla Manager Greta Solutions bad pynwai da u B Suchiang staff DLSA.