Rakhe Independence Day ka Dorbar Shnong Wahiajer, shimbynta 15 skul bad pynkupburom ia kiba pass bha

Syllad | The Rising MeghalayaAugust 17, 2025

Ka Dorbar Shnong Wahiajer haka 15 tarik Nailar, kala rakhe iaka jinglaitluid ka Ri India ne Independence Day ba 79 ha kaba u MDC ka Wahiajer Ma Reformingson Lamare ula kyntiew iaka lama lai rong ka ri.

Iaka jingialang lyngkot la pyniaid da u Ma F Shylla Assistant Waheh Shnong Wahiajer haka jingdonlang u Waheh shnong Ma Sanwotki Laloo nalor ki nonghikai bad ki riew rangbah ka shnong.

Kala don ruh ka jingiad march past bad jingshad drill kaba la shimbynta da ki 15 tylli ki skul kiba don ha kane ka shnong. La sam ruh iaki khusnam pynshlur iaki samla kiba pass bha ha ki eksamin bapher bapher.

La pynkut iaka jinglehkmen da ka jingialehkai Friendly Football Match hadpeng ki dkhot ka Dorbar Shnong Wahiajer na ka liang Mihngi bad Sepsngi.