Rakhe iaka RSS Foundation Day ha Jowai

Syllad | The Rising MeghalayaOctober 17, 2021

Ka Rashtriya Swamyam Sevak Sangh (RSS) kala rakhe iaka foundation day ne ka sngi seng nongrim ba 96th ka RSS haka sngi Saitjain.

Iaka RSS la seng ha u snem 1925 Nailur da u Dr. Kishav Baliram Hedgewar haka Vijayadashami, kaba dei sngi khraw ki riewngeit Hindu ha kaba u Ram ula jop ia u Ravana ne u Rabon uba rahbor iaka kurim u Ram ka Sita.

Ki dkhot ka RSS kila rakhe ia kane ka sngi ha ïung walieh ka Chilliangraij Jowai haka jingiadonlang u dolloi ka elaka Jowai u Puramon Kynjing, u Khroolamsalangki Pariat president Sein Khooid Ya Ka Wah Myntdu (KYKWM), u Oriland Shylla, General Secretary, Dorbar Chnong Chilliangraij bad kiwei kiwei kiba la shah khot sngewbha ha kane ka jingiakynduhlang nalor u Aditya Hajong, RSS Incharge Jowai, Nartiang & Mukhla, West Jaintia Hills District.

Ia ka jingrakhe la pynlong ha ryngkat ka nguh ka dem blei bad shuh shuh la pynkyrpang ruh da ka jingbuh ia ki tiar ialeh kum ki wait bad ki khnam kiba long shibynta ki tiar ialeh jong ki mynbarim.

Ka RSS kala pynlong iaka jingnguh jingdem iaki tiar ialeh haka Vijayadashmi, ka long shibynta ban pynehrngiew ia u shynrang uba ieng ban ialeh bad iada ialade, ia ka iing ka sem ka shnong ka thaw na ki jingeh bad jingtynjuh ba bunjait bun rukom.

U Dolloi ka Elaka Jowai, Puramon Kynjing haba ai jingkren ha kane ka sngi, u la iaroh ia u Dr. Kishav Baliram Hedgewar bad dei lyngba ka jingiohi jngai jong u ban seng bad sdang ia ka RSS ka Ri India ka long kumba ka long mynta, u da ai mynsiem ruh ia ki nongshongshnong ba kin long ki briew ba ieit ia la ka jong bad burom ia ka jong kiwei namar dei tang kane ka atiar balah ban tehsong ia ka ri India wat hapdeng ki jingiapher ha ki ba bun ki rukom.