Rai ka sorkar Jylla ban kynthup noh ia ka ktien Pnar ha ka State Anthem

Syllad | The Rising MeghalayaJanuary 15, 2025

Ka Sorkar Jylla ha ka 15 tarik Kyllalyngkot ka la rai ban pynkylla noh ia ka Meghalaya State Anthem da kaba kynthup lang noh ia ka ktien Pnar ha ki kyntien ne lyrics.

Haba pynbna ia kane ka rai hadien ka jingialang ka kynhun Myntri, u Myntri Rangbah ka Jylla u Conrad K Sangma u la ong, “Nga sngewkmen shibun ban pynbna ba ka kynhun Myntri mynta ka sngi ka la rai ban pynkylla ia ka Meghalaya State Anthem, bad ngi sngewkmen eh ban kynthup ia katto katne ki bynta (lines) ha ka ktien Pnar hapoh ka State Anthem.”

U la ong ruh ba ia kane yn sa pyllait ha ka Meghalaya Games ka ban sa long ha Wahiajer, West Jaintia Hills bad ngin sa pynsngew ha katei ka sngi.

U Myntri Rangbah u pyntip ruh ba ia kane ka rai la pynshong nongrim halor ki katto katne ki jingai jingmut na ki nongmihkhmat ka Rilum Jaintia khamtam na u Symbud Myntri Rangbah ka Jylla u Bah Sniawbhalang Dhar lem bad ki riew paidbah.