Rai ka Sorkar ban thied iing ba 20 klur ha Bangalore ban ai jaka sah ia ki khynnah pule ka Jylla

Syllad | The Rising MeghalayaMarch 27, 2025

Ka sorkar Jylla ka la shim ia ka rai ban thied ia ka iing ka ban kot T.20 klur na ka bynta ban buh ia ka Meghalaya Guest House ha Bangalore khnang ban lah ban pynbiang jaka sah ia ki nongleit nongwan bad ki khynnah pule na ka jylla Meghalaya.

Haba pyntip ia kane hadien ka jingialang ka kynhun Myntri haka 26 tarik Lber, u nongaiktien ka sorkar u Bah Paul Lyngdoh u la ong ba katei ka iing ba la tyrwa kaba don ha Bangalore kan lah ban pynbiang jaka sah na ka bynta 50 ngut ki khynnah shynrang bad 50 ngut ki khynnah kynthei.

U la ong ruh ba ka Bangalore ka dei ka jaka ha kaba ki briew na Meghalaya ki ju leit barabor bad ki don ruh shibun ki khynnah pule kiba leit ban pule ha ki kyrdan bapher bapher ha kane ka nongbah.

Haba kylli la ka don ne em ka jingthmu ban tei ia ka Meghalaya House ha Bangalore, u Bah Paul u la ong, “Ia mynta hi ka jingdonkam ba kyrkieh ka lon ban pynbiang ia ka jingdonkam jong ki khynnah pule. Ka jingthmu ban tei ia ka Meghalaya House ruh ka dei kaba la don ha ki jingmut jingpyrkhat, hynrei ban ialeh ban pynbiang ia ki jingdonkam ba kyrkieh namar ki jingeh kiba ki khynnah pule ki iakynduh ban ioh jaka sah bad namar ka jingrem dor ki jaka sah, hynrei lada tei ia ka Meghalaya House ngin donkam ban thaw shuh shuh ia ki post bad ruh ban thung ia ki ophisar.”

“Kumta khnang ban pynbiang ia ki jingdonkam ba kyrkieh ngin pynbiang shwa ha kaba iadei bad ka jingdonkam ia ka Guest House kaba thmu kyrpang na ka bynta ki nongleit nongwan bad ki khynnah pule ka jylla,” u la bynrap.