Rai ka Sorkar ban pyrkhing ia ki kali kamai ban shngain ki nongleit nongwan

Syllad | The Rising MeghalayaJuly 16, 2025

Ka Sorkar Jylla ka la rai ban pyntreikam da ki sienjam kiba thymmai kaba thmu ban nangwanrah ia ka jingshngain bad ki lad jingiada ia ki nongleit nongwan hapoh ka jylla bad kiba wan rung sha ka jylla.

Kumta baroh ki trai jong ki kali kamai ki donkam ban buh ne tah ia ki jingtip kiba donkam ha kaba iadei bad ki nongniah ki kali jong ki, kynthup ia ki jingtip ba bniah halor ka laisen, ka kyrteng, jaka sah bad ki nombor phone.     

Ia kane la pynbna da u Nongaiktien ka Sorakr MDA bad Myntri ka Tnad Tourism u Bah Paul Lyngdoh hadien ka jingialang bad u Symbud Myntri Rangbah uba khmih ia ka Tnad Transport, u Bah Sniawbhalang Dhar ha Secretariat haka 15 tarik Naitung.

“Ka jingthmu ba kongsan haba shim ia kane ka sienjam ka long ban pynduna ia ki jingma na ki kam runar ba la leh da kaba pyndonkam da ki kali kamai bad ruh ban wanrah shuh shuh ia ka jingsngew shngain hapdeng ki nongleit nongwan. Da kaba tip mano ba niah ia ka kali kaba ki shong, ki nongleit nongwan kin kham sngew shngain shibun,” ong u Bah Paul haba kren sha ki nongthoh khubor.

U la bynrap ruh ba kane ka rule kan treikam ia baroh ki kali kamai hapoh ka jylla Meghalaya, kata kaba kynthup ia kito ki kali kiba la ioh permit na ka Tnad Transport lyngba ki District Transport Officers (DTO). Hynrei, kane kan ym treikam satia ia ki kali ba pyndonkam da ki riew shimet, ki kali sorkar bad kiba pyniaid da ki Corporation bad Undertaking ka sorkar.

Hadien ba la pynmih ia ka jingpynbna ha kaba iadei bad kane, ki trai jong ki kali kamai kin ioh por shibnai ban pyntreikam ia kine ki kyndon bathymmai, ong u Bah Paul da kaba bynrap ba kane ka sienjam la khmih lynti kan nangwanrah ia ka jingsngew shngain hapoh ka Jylla Meghalaya hi baroh kawei, khamtam da ka jingnangkiew ha ka jingwan jong ki nongshangkai pyrthei.