Rai ka Sorkar ban pynkynriah noh ia 708 tylli ki kam ka BWHG sha ka SDRF

Syllad | The Rising MeghalayaAugust 27, 2025

Ka sorkar jylla ka la rai ban pynkynriah noh ia ki 708 tylli ki kam permanent jong ka Border Wing Home Guards sha ka State Disaster Response Force (SDRF) hadien ka rai jong ka Iingkashari kaba lam sha ka jingthungkam ba pura ia kine ki nongtrei.

“Ngi la ai ka jingmynjur ban pynkynriah noh ia ki 708 tylli ki kam ka BWHG sha ka SDRF. Ia kane ka leh namar ka don ka rai jong ka Iingkashari kaba la iaid bun snem mynta,” ong u Myntri Rangbah Conrad K Sangma haba kren sha ki lad pathai khubor hadien ka jingialang jong ka Kynhun Myntri ha ka 26 tarik Nailar.

U la pynbna ba ka sorkar kan sa thung biang ia 708 ngut ki volunteer kiba thymmai ban pyndap ia ki kam kiba lait da kaba pyndonkam ia ka pisa kaba ioh na ka Sorkar Pdeng.

“..namar ngin pynkynriah noh ia ki shirta sha ka SDRF, kumta kane kan pyllait ia ki kam ba 708 ngut briew na ka bynta jong ngi ban long kum ki volunteer. Ngin sa thung ia ki 708 ngut ki briew namar kane ka pisa ka don bad ka sorkar India,” u la ong.

U Myntri Rangbah u la kular ba namar ka hukum jong ka Iingkashari, ka sorkar kan sa shim ia ki sienjam kiba donkam ban pynthikna ba kum kine ki juh ki jingjia kin ym jia shuh hadien habud.