Rai ka Sorkar ban pynkhlain ia ka MRSSA ban khanglad ia ki runar ba wan kum ki tourist

Syllad | The Rising MeghalayaJune 13, 2025

Ka Sorkar Jylla haka 13 tarik Jylliew ka la shim ia ka rai ban nangpynkhlain shuh shuh ia ka ain Meghalaya Residents, Safety and Security Act (MRSSA), 2016 khnang ban lah ban pynduna bad khanglad ia ka jingwan rung ki riew bymman sha Meghalaya ha ka rukom kum ki nongwan shangkai pyrthei.

Kane ka jingtywa la shim ba ka long kaba kongsan bha khamtam hadien ka jingjia shah pyniap jong uwei u nongwan shangkai na Indore, Madhya Pradesh, u Raja Raghuvanshi uba la shah pyniap ha la ka jong ka kurim bad ki paralok u samla jong ka ha ka jingwan shangkai sngewbha sha Sohra.

Haba kren sha ki lad pathai khubor hadien ka jingialang jong ka kynhun Myntri, u Nongaiktien ka sorkar MDA u Myntri u Bah Paul Lyngdoh u la ong, “Ka kynhun Myntri mynta ka sngi ka la rai ruh ban shong bishar biang ia ka MRSSA kaba dei ka ain ka jylla kaba la don lypa bad ban nangpynkhain shuh shuh ia kane ka ain hadien ba ngi la sakhi ia kaei kaba la jia ha ka thain Sohra khnang ban pynthikna ba ngin lah ban pynduna katba lah ia ka jingwan rung ki riew sniew sha Meghalaya ha ka rukom kum ki nongwan jngohkai.”

Ha kaba iadei bad ka jingiakhih pyrshah halor ka jingpynslem ban pyntreikam ia ka Inner Line Permit (ILP) ha Meghalaya, u Bah Paul u la ong ba kane ka kam ka dang sahkut hapoh ka Ministry of Home Affairs (MHA).

“Ha kaba iadei bad ka ILP, shah ba ngan pynkynmaw ia phi ba ka Iingdorbar Thaw ain ka jylla ka la dep ban mynjur ia ka Resolution. Kane ka kam ka dang sahkut hapoh ka MHA, kaba la buh shibun ki jingkylli, ia kaba ngi kum ka sorkar ngi la pyrshang ban leh ei ei. Katto katne na kine ki jingkylli ki iadei bad ka jingshisha ba ka Meghalaya kam dei  ka jaka kaba don jingkut, hynrei ka dei ka lynti iaid sha kiwei pat ki jylla jong ka thain Shatei Lammihngi kum sha Silchar bad kiwei pat ki jylla kum sha Mizoram bad Tripura, “ u la ong.

Haba kylli, u Bah Paul u la ong, “Hynrei lada phi iaid lyngba ka MRSSA ki la don lypa shibun kiei kiei, hynrei ngi donkam ban nangpynkhlain bad pynjanai ia kiei kiba ngi la don lypa ha ka MRSSA.”

Katkum ka jingpynpaw ka jong u, na ka liang ka sorkar shen kan sa wanrah ia ka jingtyrwa na ka bynta ban pynkhlain shuh shuh ia ka MRSSA.